भदौ २७, काठमाडौं : काठमाडौं महानगरपालिका-१४ खड्कागाँउबाट करिब २ किलो अवैध लागूऔषध पोल्याड सहित काठमाडौं गुर्जुधारा बस्ने धादिंङ थाक्रे गाउँपालिका-५ घर भएका १९ वर्षीय कविर तामाङ लगायत २ जनालाई शनिबार दिउँसो प्रहरीले पक्राउ गरेको छ । महानगरीय प्रहरी प्रभाग स्यूचाटारबाट खटिएको प्रहरीले उनीहरुलाई उक्त पोल्याण्ड सहित फेला पारी पक्राउ गरेको हो ।
यसैगरी काठमाडौं महानगरपालिका-२६ ठमेलबाट २ किलो अवैध लागूऔषध अफिम सहित २ जनालाई शनिबार दिउँसो प्रहरीले पक्राउ गरेको छ । पक्राउ पर्नेहरुमा रुकुम (पूर्व) रुकुमकोट गाउँपालिका-४ बस्ने ४१ वर्षीया धनमाया पुन र रुपन्देही तिलोत्तमा नगरपालिका-९ बस्ने ३७ वर्षीय रुद्र राना रहेका छन् । लागूऔषधको कारोबार भईरहेको भन्ने सूचनाको आधारमा महानगरीय प्रहरी वृत्त लैनचौरबाट खटिएको प्रहरीले जाँच गर्ने क्रममा उनीहरुको साथबाट उक्त अफिम फेला पारी पक्राउ गरेको हो ।
ललितपुर, वागमती गाउँपालिका छपेलीबाट करिब ९ किलो अवैध लागूऔषध गाँजा सहित मकवानपुर भिमफेदी गाउँपालिका-८ ईपा बस्ने ५३ वर्षीय शेर बहादुर थिङ लगायत २ जनालाई शनिबार दिउँसो प्रहरीले पक्राउ गरेको छ । बा.४ ख २३३ नम्बरको बसलाई प्रहरी चौकी भट्टेडाँडाबाट खटिएको प्रहरीले जाँच गर्न क्रममा बसमा सवार उनलाई उक्त गाँजा सहित फेला पारी पक्राउ गरेको हो ।
कास्की, पोखरा महानगरपालिका-३० पावर हाउसस्थित सडकबाट करिब ३ किलो अवैध लागूऔषध गाँजा सहित पोखरा महानगरपालिका-६ लकेसाइड बस्ने धादिङ खनियाबास गाउँपालिका-४ घर भएका १९ वर्षीय करण तामाङलाई शनिबार राति प्रहरीले पक्राउ गरेको छ । काठमाडौंबाट पोखरातर्फ जाँदै गरेको ग.१ ख २५३० नम्बरको माइक्रोलाई वडा प्रहरी कार्यालय गगनगौडाबाट खटिएको प्रहरीले जाँच गर्ने क्रममा माइक्रोमा सवार उनलाई झोलामा ल्याएको उक्त गाँजा सहित फेला पारी पक्राउ गरेको हो ।
यस सम्बन्धमा प्रहरीले थप अनुसन्धान गरिरहेको छ ।
