सरकारप्रति असन्तुष्टि जनाउँदै संयुक्त लोकतान्त्रिक मधेसी मोर्चाले संसद बैठक बहिस्कार गरेको छ ।

शुक्रबार बसेको संसदको बैठक सुरु हुनासाथ संघीय समाजवादी फोरमका अशोक राईले विशेष समय लिएर बोलेका थिए ।

सरकार गठन गर्दा तीनबुँदे सहमति भएको भन्दै उनले सहमति कार्यान्वयन हुन नसकेको बताए । मुद्दा फिर्ता लिने सहमति भएपनि अझै मुद्दा लगाउने काम भइरहेको भन्दै फोरम नेपालका बरिष्ठ नेता राईले भने, ‘आन्दोलन गर्न आदेश दिने नेताहरु सरकारको कुर्सीमा बसिरहेका छन् । तर, आन्दोलनको आदेश मान्ने कार्यकर्तालाई थुनिराख्नु औचित्य छैन । अविलम्ब रिहा गर्नुपर्छ ।’

राई बोलेपछि मधेसी मोर्चामा आवद्ध दलका नेताहरु संसद बैठकबाट बाहिरिएका छन् ।