काभ्रे, १३ माघ :

काभ्रेको दक्षिणी क्षेत्रका १० भन्दा बढी गाविसको सर्वसाधारणलाई फाइदा पुग्ने गरी रोशी नदिमा पुल निर्माण हुने भएको छ । जिल्लाको शिखरआम्बोटे, खहरेपाँगु, भुग्देउ महाँकाल लगायत १० भन्दा धेरै गाविसका सर्वसाधारणहरुले पुल नहुँदा जोखिम मोलेर नदि तर्नुपर्ने अवस्थाको अन्त्य गर्न पुल निर्माण सुरु भएको हो । निर्माणाधीन पुलको काभ्रे क्षेत्र नंवर २ का सांसद रामहरि सुवेदीले शिलान्यास गरेका छन् । पटक पटक उक्त क्षेत्रबाट प्रतिनिधित्व गर्ने जनप्रतिनिधिहरुले रोशी नदिमा पुल निर्माणका लागि आश्वासन दिएपनि पुरा हुन सकेको थिएन ।

डन समेत रहेका फोरम नेता गणेश लामा, उनका बाबु, राप्रपा, नेपाली कांग्रेस, नेकपा माओवादी केन्द्रका ब्यक्तिहरुले समेत फलामेसाँघुमा पुल निर्माणका लागि नामजाँचसमेत गरेका थिए । तर, काभ्रे क्षेत्र नंवर २ मा विजयी भएसँगै सांसद सुवेदीले पुल निर्माणको पहल अघि बढाएका थिए । उनले आफै पुलको नापजाँच गरेर सडक डिभिजन कार्यालय मार्फत निर्माणका लागि रकम बिनियोजन गराएका थिए ।

त्यसपछि झण्डै चार करोड बराबरको लागतमा रोशी नदिको फलामेसाँघुमा पुल निर्माण सुरु भएको हो । यस अघि उक्त क्षेत्रबाट नेपाली कांग्रेसका तत्कालिन सभापति शिवप्रसाद हुमागाई, माओवादीका अक्कल बहादुर थिङ विजयी भएका थिए । उनिहरुले समेत शिखरआम्बोटे गाविस र आसपास क्षेत्रका सर्वसाधारणलाई पुल निर्माणको आश्वासन दिए पनि पुरा भएको थिएन । २०७४ असार मसान्त भित्रै निर्माण कार्य सम्पन्न गर्ने गरी सम्झौता भएको उक्त पुल निर्माण पछि सोहि क्षेत्रमा विकासको सम्भावना र त्यहाँको उत्पादन बजारसम्म आउन सहज हुनेछ । पुल नहुँदा नदिको सतह बढेपछि रोशी वारीपारी यातायात बन्द हुँदै आएको थियो । उक्त पुल निर्माणपछि महादेवटार, सिपाली, शिशाखानी, कटुञ्जे, घर्तिछाप, बुढाखानी, गोकुले, बनखुु, महाँकाल, खहरेपाँगुका सर्वसाधारण लाभान्वित हुनेछन् ।