कोभिड-१९ विरुद्धको भेरोसेल खोपको दोस्रो मात्रा मंगलबारदेखि लगाउन सुरु गरिएको छ। चीनबाट ल्याएको भेरोसेल खोपको पहिलो मात्रा लगाएका ६० देखि ६४ वर्ष उमेर समूहका नागरिकलाई दोस्रो मात्रा दिन लागिएको स्वास्थ्य तथा जनसंख्या मन्त्रालयले जानकारी दिएको छ ।

भेरोसेल खोपको दोस्रो मात्रा लगाउन काठमाडौंको नयाँ वानेश्वरस्थित निजामती कर्मचारी अस्पताल खोप केन्द्र तोकिएको छ । यहाँ सयौं सर्वसाधारण खोपको प्रतीक्षामा लाइन बसेका छन् । अस्पताल परिसरभित्रबाट सुरु भएको लाइन गेटबाहिर पनि ५०० मिटर भन्दा लामो बनेको । लाइनमा ज्येष्ठ नागरिकका साथै यसअघि भेरोसेल खोपको पहिलो मात्रा लगाएकाहरु पनि रहेका छन् । सरकारले गत जेठ २५ गतेदेखि २९ गतेसम्म भेरोसेल खोपको पहिलो मात्रा देशभर दिइएको थियो । मन्त्रालयका अनुसार पहिलो मात्रा लगाएका ज्येष्ठ नागरिकको संख्या तीन लाख ७० हजार छन् । भेरोसेलको पहिलो मात्रा लगाएका तर विविध कारणले दोस्रो डोज लगाउन छुटेका नागरिकलाई समेत यसपटक दोस्रो मात्रा दिइने मन्त्रालयले जनाएको छ ।