काठमाडौं । अखिल नेपाल फुटबल संघ (एन्फा) अध्यक्षमा पंकजविक्रम नेम्वाङ निर्वाचित भएपछि नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीको नेपाल नफर्किने संकेत देखिएको हो ।
सोमबारको निर्वाचनमा कर्माछिरिङ शेर्पालाई पराजित गर्दै नेम्बाङ अध्यक्षमा निर्वाचित भए लगत्तै अलमुताइरीले सामाजिक सञ्जालमार्फत् यस्तो संकेत गरेका थिए । नेम्बाङ निर्वाचित भएपछि उनले आफ्नो इन्स्टाग्राममा स्टोरी राख्दै नेपाल नफर्किने संकेत गरेका थिए ।
अलमुतारइरीले गत वर्ष साउनमा नेम्बाङको कारण आफूले राजीनामा घोषणा गरेका थिए । उनले सामाजिक सञ्चालबाट राजीनामा घोषणा गरे पनि राजीनामा भने दिएका थिएनन् । प्रशिक्षक अलमुताइरी र खेलाडीबीच विवाद छ । वैशाख १० गते प्रशिक्षकको व्यवहारप्रति असन्तुष्ट १० खेलाडीले प्रशिक्षण छोडेका थिए ।
यसैगरी, आफ्नो पक्षमा बोल्ने व्यक्ति अध्यक्ष पदमा पराजित भएपछि एएफसी एसियन कप छनोटका लागि कुवेत पुगेका अलमुताइरीले नेपाल नफर्किने संकेत गरेका हुन् । उनले उक्त पोस्ट भने केही समयपछि सामाजिक सञ्जालबाट हटाएका थिए ।
