काठमाडौं । काठमाडौं महानगरपालिकाको वडा नम्बर ४ महाराजगञ्जमा मकै बेच्दै हिँडेकी एक महिलाको ठेलालाई नगर प्रहरीले नियन्त्रणमा लिएको छ ।

शुक्रबार आफ्नो ठेला प्रहरीले उठाएपछि महिलाले हार गुहार गरिन् । तर नगर प्रहरीले उनलाई उल्टै सडकमा लछार पछार गर्‍यो । एक पुरुष प्रहरीलाई रोक्ने प्रयास गरे पनि ठेला र मकै गाडीमा हालेर लगिन्छ । पत्रकार सृष्टि काफ्लेले घटनाको भिडियो ट्वीटरमा पोष्ट गरेकी छन् । नगर प्रहरीले गरेको ज्यादतीको आलोचना सामाजिक सञ्जालमा व्याप्त रुपमा भइरहेको छ ।

महानगरका नगर प्रहरी प्रमुख धनपति सापकोटाले भने, ‘यस्तो घटना त दैनिक दशौं हुन्छन् । हामीले पटक पटक ठेलागाडा नराख्न भनेका छौैं । फुटपाथ र सडकमा नराख्नु भनेको ठाउँमा ठेला राखेपछि जफत हुने कुरा सामान्य हो । नगर प्रहरीको नजर नपर्ला कि भनेर हेपेर ठेलाहरु राख्छन् । हामीले छोड्ने हो भने त फुटपाथ र सडक कसरी व्यवस्थापन हुन्छ?’

उनले जफत भएको ठेला र सामान फिर्ता नहुने बताए । महानगरले यी सामान लिलामी गर्ने गर्छ । महानगरका सूचना अधिकारी वसन्त आचार्यले भने यो विषयमा जानकारी नभएको प्रतिक्रिया दिएका छन् । काठमाडौं महानगरका मेयर बालेन साह पनि यस विषयमा मौन छन् ।

This is such a sad scene !!! Right now at Baluwatar. Is this the long-term solution for street vendors?? #KathmanduTales pic.twitter.com/38TMca1pWe

— Shristi Kafle (@KafleShristi) July 1, 2022