काठमाडौं । भोजपुरी फिल्मका हिरोइन बनाइदिने भन्दै १५ वर्षीय बालिकालाई बिक्री गर्ने दुई जना पक्राउ परेको जनाइएको छ ।
पर्सा प्रहरीले बालिकाले बिक्री भएको ठाउँबाट भागेर आइ दिएको बयानका आधारमा दुई अभियुक्तलाई पक्राउ गरेको छ । भारत बिहार जिल्ला सितामढी, बासपट्टी पचरा बस्ने २२ बर्षीय रोशन तिवारी र साविक रौतहट जिल्ला गौर नगरपालिका वडा नं. २ की ४० वर्षीया चमेली देवी पक्राउ परेका हुन् ।
चमेली हाल वीरगन्ज महानगरपालिका वडा नम्बर १६ नगवामा बस्दै आएकी थिइन् । पर्साका प्रहरी नायव उपरिक्षक प्रल्हाद कार्कीले उनीहरुलाई वीरगन्जबाट नै पक्राउ गरिएको बताए । अभियुक्तद्वयले बेचेको ठाउँबाट बालीका भागेर आफन्त हुँदै प्रहरी सम्पर्कमा आएकी थिइन् ।
अभियुक्तहरुले भोजपुरी फिल्ममा हिरोइन बनाईदिने भन्दै वीरगन्जकै पीडित बालिकालाई २०७८ साल माघ १२ गते ललाई फकाई लगी एक भारतीयलाई ३० हजारमा बेचेको खुलासा भएको छ । उनलाई किन्ने व्यक्तिले विभिन्न कार्यक्रममा अश्लिल नृत्य गर्न बाध्य बनाई, कसैसँग सम्पर्क गर्न नदिई शारिरीक र मानसिक यातना दिएको पनि बालिकाको प्रहरीमाफ खुलाएकी छन् ।
