काठमाडौं । कोरोनाका कारण बन्द रहेको पोखराको हट एयर बलुन आगामी भदौबाट पुनः सञ्चालनमा आउने जनाइएको छ । उक्त एड्भेन्चर ‘बलुन नेपाल प्रा.लि’ले पुनः सञ्चालनमा ल्याउने भएको छ ।

कम्पनीले यसअघि पोखरामा सन् २०१८ नोभेम्बर १६ देखि हट एयर बलुनको उडान सुरु गरेको थियो । हट एयर बलुन फेवातालको माथिल्लो किनार पामेबाट उडान सुरु गरिनेछ । फेवा किनारबाट तीनदेखि चार हजार मिटर उचाइ लिँदै गर्दा सुन्दर पोखरा उपत्यका र आसपास छर्लङ्गै देखिन्छ । बलुनले सराङ्कोट डाँडा नाघेपछि अन्नपूर्ण हिमशृफ्लाको अदभूत दृश्य हेर्न पाइन्छ ।

उक्त कम्पनीले वर्षायामका तीन महिना असार साउन र भदौबाहेक हरेक महिना मौसम अनुकुल भएको दिन उडान भरिने जनाएको छ । नेपालीलाई प्रति व्यक्ति ८ हजार रुपैयाँ र विदेशीलाई प्रति व्यक्ति १ सय यूएसडी अर्थात नेपाली १२ हजार ६ सय रुपैयाँ लाग्नेछ । साथै, प्रती व्यक्ति २० हजार डलर बराबरको इन्स्योरेन्स समेत रहेको जनाइएको छ ।

कम्पनीले बलुनको उडान अवधि ३० देखि ४० मिनेट रहने जनाएको छ । २१ मिटर अग्लो बलुनको तल्लो भागमा ३२ वर्ग फिटको बास्केट जडित छ । जहाँ ८ जनाले एकै पटक यात्रा गर्न मिल्नेछ ।