काठमाडौं । ‘सुन मान्छे’का रुपमा चिनिएका ४८ वर्षीय सुवास घिसिङ सरकारी कर्मचारीलाई कुटपिट गरेको आभियोगमा पक्राउ परेका छन् ।
उनी धनकुटाको पाख्रिवास घर भइ हाल काठमाडौंको गोकर्णेश्वर नगरपालिका–६ मा बस्दै आएका छन् । सोमबार घिसिङले नयाँबस्ती एभरेष्ट पम्पसँगै रहेको बागमती सभ्यता एकीकृत विकास समिति गुहेश्वरी फाँटका कर्मचारी बलराम श्रेष्ठलाई मुक्का हानेपछि प्रहरी बिट नयाँ बस्तीका प्रहरी टोलीले पक्राउ गरेको थियो ।
ठेकेदार समेत रहेका घिसिङले फोहोर अनुगमनको क्रममा फोहोरको बिषयलाई लिएर विवादमा श्रेष्ठलाई टाउकोमा मुक्का प्रहार गरी घाइते बनाएका थिए । हाल घिसिङलाई घटनाबारे थप अनुसन्धान गर्न ज्यान मार्ने उद्योगमा तीन दिन म्याद थप गरिएको जनाइएको छ ।
