काठमाडौं । अख्तियार दुरुपयोग अनुसन्धान आयोगले गत आर्थिक वर्ष २०७८/७९ मा कार्यालयमा प्राप्त उजुरीमध्ये ७० प्रतिशत फर्स्योट गरेको छ । आयोगले गत आवमा सम्पादन गरेको कार्यको प्रारम्भिक तथ्याङ्कअनुसार अघिल्लो आर्थिक वर्ष २०७७/७८ मा उजुरी फर्स्योटको प्रतिशत ६४.२३ थियो ।

आइतबार सार्वजनिक गरिएको विवरणअनुसार आयोगमा गत आव २०७८/७९ मा १४ हजार १४८ वटा उजुरी दर्ता भएका थिए । त्यसबाहेक अघिल्लो आर्थिक वर्षमा आयोगमै दर्ता भएका उजुरीमध्ये आठ हजार ९३ वटा गत आर्थिक वर्षमा सरेर आएका थिए । दुई आर्थिक वर्षको समेत गरेर कुल २४ हजार २४१ उजुरीमध्ये १७ हजार ९८ वटाको फर्स्योट भएको छ । आयोगमा अघिल्लो आर्थिक वर्षमा २२ हजार ६२५ वटा उजुरी दर्ता भएको थियो । त्यतिखेर कुल उजुरीमध्ये १४ हजार ५३२ वटाको फर्स्योट भएको थियो । आयोगका प्रवक्ता श्यामप्रसाद भण्डारीले आयोगले गत आर्थिक वर्षमा ८२० वटा उजुरीलाई विस्तृत अध्ययनमा लगेको बताए । आयोगले लिखित निवेदन, इमेल, फेसबुक, वेबसाइट, भाइबर, टेलिफोन, मोबाइल एसएमएस, हुलाकलगायत विभिन्न ११ वटा स्रोतबाट उजुरी प्राप्त गरेको थियो । आजको गोरखापत्र दैनिकमा समाचार छ ।