काठमाडौं । बेलायती प्रधानमन्त्री बोरिस जोनसनको सरकारले विश्वासको मत लिन सफल भएको छ ।
सत्तारुढ कन्जरभेटिभ पार्टीका सदस्यहरूले चुनाव गराउनबाट बच्न मन्त्रीहरूको समर्थनमा मतदान गरे । त्यस्तै, विपक्षी लेबर पार्टीले जोनसनलाई राजीनामा दिन आह्वान गरेको छ । जोनसनले कन्जरभेटिभ पार्टीले सेप्टेम्बरको सुरुमा आफ्नो उत्तराधिकारी चयन नगरेसम्म आफू प्रधानमन्त्री रहने बताएका छन् ।
जोनसनले कन्जरभेटिभको संसदीय दलको नेताबाट राजीनामा दिइसकेकाले अर्को नेता नचुन्जेल उनी पार्टीको कामचलाउ नेताको रुपमा छन् । कन्जरभेटिभ नेता छान्ने पक्रिया सुरु भइसकेको छ । विपक्षीले जोनसनलाई अविश्वासको प्रस्तावमार्फत हटाउनुपर्ने जनाएको थियो । तर, उनले राजीनामा दिने बताइसकेको र संसदीय दलको नेताबाट पनि हटिसकेकोले तत्काल पदमुक्त गर्नु नपर्ने कन्जरभेटिभले बताएको छ ।
