काठमाडौं । मकवानपुरको हेटौंडा क्याम्पसमा स्नातक तह दोश्रो वर्षको परीक्षा चलिरहेको बेला गार्डले खानतलासीको नाममा छात्रालाई दुर्व्यवहार गरेको भन्दै विद्यार्थीले तोडफोड गरेका हुन् ।
हिजो मंगलबार हेटौंडा क्याम्पस केन्द्रमा परीक्षा दिन गएका मकवानपुर बहुमुखी क्याम्पसका दुई छात्राले परीक्षा गार्डले चिट लुकाएको भन्दै खानतलासी गरेर दुर्व्यवहार गरेको आरोप लगाएका छन् । दुर्व्यवहारको कुरा बाहिर आएपछि बुधबार विद्यार्थीले तोडफोड गरेका छन् ।
उक्त क्याम्पसले घटनापछि विज्ञप्ति निकालेर घटनाबारे छानबिन गरी दोषीलाई कारबाही गर्ने प्रतिवद्धता जनाएको छ । तोडफोडको कारण आज बुधबार हेटौंडा क्याम्पस केन्द्रमा हुने कक्षा ११ को ग्रेडवृद्धि परीक्षा रोकिएको छ । बिहीबारदेखिका परीक्षा भने पूर्वनिर्धारित तालिका अनुसार हुने जनाइएको छ ।
