काठमाडौं । आज साताको पहिलो कारोबार दिन आइतबार नेपाली शेयर बजारमा उछाल आएको छ ।
शेयरबजार मापक नेप्से परिसुचक आज ६१.०५ अंकले बढेको छ । नेप्से सूचक ३.०३ प्रतिशलते सुधार भएर २०७८.५१ अंकमा रोकिएको छ ।
आज कुल २१९ कम्पनीको ६४ लाख २३ हजार १४६ कित शेयर खरिदबिक्री हुँदा २ अर्ब ७३ करोड रुपैयाँको कारोबार भएको छ । आज १३ उपसूचक सबै बढेका छन् । जसमध्ये, फाइनान्स उपसूचक ७.२२ प्रतिशतले सबैभन्दा धेरै बढेको छ ।
आइतबार शिभम सिमेन्ट्स लिमिटेडले ३९ करोड ७१ लाख रुपैयाँले सबैभन्दा धेरै शेयर कारोबार गरेको छ ।
त्यस्तै, यस दिन सेन्ट्रल फाइनान्स कम्पनी लिमिटेड, समृदुधि फाइनान्स कम्पनी लिमिटेड र मल्टिपर्पस फाइनान्स कम्पनी लिमिटेडको सेयर १० प्रतिशतले बढेको छ । त्यस्तै, आज सबैभन्दा धेरै गुमाउनेमा (१० प्रतिशत डिबेन्चर २०८५) का लगानीकर्ता रहेका छन् ।
बजारमा मौद्रिक नीतिपछि शेयर बजार घट्ने आंकलन विपरित बजार उकालो लागेको छ । शुक्रवार जारी भएको मौद्रिक नीतिले शेयरधितो कर्जामा लगाएको ४/१२ करोडको सिमालाई सामान्य संसोधन गरेको छ । राष्ट्र बैंकले ४/१२ करोडको सिमालाई संसोधन गर्ने क्रममा तल्लो सिमालाई हटाएर माथिल्लो मात्रै सिमा कायम राख्दै बैंक वित्तीय संस्था मार्फत प्रवाह हुने यस्तो कर्जालाई क्रमश ब्रोकर मार्फत मार्जिन ल्याण्डिङमा आकर्षित गर्ने नीति लिएको छ । जसले ब्रोकर आफैले बैंकबाट कर्जा लिएर लगानीकर्तालाई मार्जिन सुविधा दिन सक्नेछन् ।
दोस्रो बजारमा सूचिकृत बैंक वित्तीय संस्था तथा कम्पनीहरुले गत आर्थिक वर्षको चौथो त्रैमाशिक वित्तीय विवरण सार्वजनिक गर्न थालेका छन् । जहाँ मुनाफामा उल्लेख बृद्धि भएको देखिन्छ ।
चौथो त्रैमाशिक वित्तीय विवरणले आकर्षित गरेका लगानीकर्ताले अवको केहि समयमा घोषणा हुने लाभांशलाई समेत आकलन गर्न थालेदेखि आज दोस्रो बजारमा उछाल आएको हो ।
