काठमाडौं । बैतडीमा आज बिहान छोराले बञ्चरो प्रहार गरी बुवाको हत्या गरेका छन् ।
डिलाशैनी गाउँपालिका-५ शेरामा २२ वर्षीय लोकराजले बिहान ६ बजे बञ्चरो प्रहार गरी ६८ वर्षीय अन्तराम जोशीको हत्या गरेका हुन् । डिलाशैनी गाउँपालिका-५ का वडाध्यक्ष तथा गाउँपालिकाका प्रवक्ता यज्ञराज भट्टले बिहान घरमै ठेकी सफा गरिरहेका अन्तरामलाई लोकराजले बञ्चरो प्रहार गरेको जानकारी दिए ।
उनका अनुसार मानसिक अवस्था ठिक नभएका लोकराजले बञ्चरो प्रहार गरेका थिए र टाउकोमै चोट लागेका अन्तरामको घटनास्थलमै मृत्यु भएको हो । बैतडीका प्रहरी प्रवक्ता, प्रहरी निरीक्षक लोकराज जोशीले छोरो लोकराजलाई नियन्त्रणमा लिएको जनाए । इलाका प्रहरी कार्यालय पाटनबाट प्रहरी निरीक्षक कमल चौधरी नेतृत्वको टोली अनुसन्धान गर्न घटनास्थल पुगेको छ ।
