काठमाडौं । बैंकले बिहीबार सार्वजनिक गरेको अपरिस्कृत वित्तीय विवरण अनुसार आ.व २०७८/७९ मा २ अर्ब ६९ करोड रुपैयाँ मुनाफा आर्जन गरेको छ । यद्यपि, खुद ब्याज आम्दानी बढे पनि ट्रेडिङ आम्दानी नहुँदा कृषि विकास बैंकको नाफा घटेको छ ।

आ.व २०७७/७८ मा ३ अर्ब ५२ करोड ७५ लाख रुपैयाँ खुद मुनाफा आर्जन गरेको बैंकको नाफा गत आ.व.को तुलनामा २३.७४ प्रतिशतले घटेको हो । गत आ.व.मा खुद ब्याज आम्दानी १३.३० प्रतिशतले बढेर ७ अर्ब ७७ करोड ७७ लाख पुगेको छ । बैंकले कर्जा लगानी १८.५४ प्रतिशतले विस्तार गरी १ खर्ब ७८ अर्ब ५१ करोड ४८ लाख पुर्‍याएको छ । साथै, निक्षेप २.२६ प्रतिशतले बढाएर १ खर्ब ६६ अर्ब ४९ करोड ७० लाख रुपैयाँ पुर्‍याएको छ । बैंकको खुद ब्याज र कर्जा विस्तार आर्जन दुवै बढेको छ ।

अघिल्लो आ.व.मा ९९ करोड ४३ लाख खुद ट्रेडिङ आम्दानी गत आ.व.मा २६ करोड २५ लाखको घाटा रहेको छ । जसले बैंकको खुद सञ्चालन आम्दानी घटेको छ । अघिल्लो आ.वमा ९ अर्ब ७५ करोड ७१ लाख रहेको बैंकको खुद सञ्चालन आम्दानी गत आ.व.मा ८ अर्ब ८५ करोड ६७ लाख पुगेको छ । यसरी बैंकको सञ्चालन नाफा घटेको छ ।

यसैगरी, बैंकको कर्मचारी खर्च ०.५५ प्रतिशतले बढेर ३ अर्ब ३२ करोड ९६ लाख रहेको छ । सञ्चालन मुनाफा भने १८.२५ प्रतिशतले घटेर ४ अर्ब ११ करोड ८२ लाख रुपैयाँ पुगेको छ । बैंकले गत आ.वमा २० प्रतिशत बोनस सेयर मार्फत चुक्ता पूँजी १० अर्ब ९८ करोड ९९ लाखबाट १३ अर्ब १८ करोड ७९ लाख पुर्‍याएको छ । बैंकको सञ्चित कोषमा ३ अर्ब ९० करोड ७० लाख र जगेडा कोषमा ११ अर्ब २२ करोड २० लाख रुपैयाँ रहेको छ । नाफा घटेसँगै प्रतिसेयर आम्दानी २४.२८ रुपैयाँबाट घटेर १७.९३ रुपैयाँ पुगेको छ । त्यस्तै, प्रतिसेयर नेटवर्थ २३५.५८ रुपैयाँबाट घटेर २१२.२५ रुपैयाँमा झरेको छ । यस्तै बैंकको मूल्य आम्दानी अनुपात १८.४६ गुणा छ ।

बैंकको कोषको लागत बढेसँगै बेसरेट ७.१३ प्रतिशतबाट ८.९० प्रतिशत पुगेको छ । यस्तै निष्किय कर्जा १.८८ प्रतिशतबाट १.६८ प्रतिशतमा झरेको छ । यस्तै बैंकको कर्जा–निक्षेप अनुपात ८९.१७ प्रतिशत छ ।