काठमाडौं । साताको पहिलो कारोबार दिन आज  आइतबार  पनि सेयर बजारले ओरालो यात्रालाई नै निरन्तरता दिएको छ । नेपाल स्टक एक्सचेञ्जका अनुसार आज (आइतबार) सेयर कारोबार मापक नेप्से परिसूचक ३३.९७ अंकले घटेर १८७६.४१ विन्दुमा झरेको छ । नेप्से १.७९ प्रतिशतले घटेको हो । यस्तै, सेन्सेटिभ परिसूचक पनि ६.०४ अंकले घटेर ३६५.८६ विन्दुमा झरेको छ ।

कूल २२९ वटा कम्पनीको ६२ लाख ९६ हजार ४ सय ४५ कित्ता सेयर खरिदबिक्री हुँदा एक अर्ब ६० करोड १८ लाख २२ हजार ९ सय ५५ रूपैयाँ बराबरको कारोबार भएको नेप्सेले जनाएको छ । स्टकका अनुसार कारोबार भएका १३ उपसमूहमध्ये सबै वटा उपसमूहको सेयर घटेको छ । सबैभन्दा धेरै व्यापार समूह घटेको छ ।

आइतबार लक्ष्मी बैंक लिमिटेडको सर्वाधिक कारोबार भएको छ । बैंकको २१ करोड ३८ लाख ४४ हजार रूपैयाँ बराबरको कारोबार भएको हो । आज ग्लोबल आईएमइ सम्मुनत योजनाको मूल्य सबैभन्दा धेरै बढेको छ । उक्त फण्डको मूल्य ५.३५ प्रतिशतले बढेर ८ रूपैयाँ ८६ पैसा पुगेको छ ।

यस दिन बलेफी हाइड्रोपावर कम्पनी लिमिटेडको सेयरमूल्य सबैभन्दा धेरै घटेको छ । कम्पनीको सेयरमूल्य ७.८५ प्रतिशतले घटेर २ सय ७० रूपैयाँमा झरेको छ ।