काठमाडौँ । चिसो बढ्दै जाँदा देशभरको जनजीवन प्रभावित हुन थालेको छ । मौसम पूर्वानुमान महाशाखाका अनुसार आज काठमाडौं उपत्यकाको न्यूनतम तापक्रम ३।८ डिग्री सेल्सियस मापन गरिएको छ । बिहान पौने ९ बजेको यो तापक्रम काठमाडौंको यो वर्ष आजसम्मकै कम हो । काठमाडौंको हिजो बिहानको न्यूनतम तापक्रम ५।५ डिग्री सेल्सियस थियो ।

यसअघि, गएको आइतबार काठमाडौं उपत्यकाको न्यूनतम तापक्रम यो वर्षकै कम ४।३ डिग्री सेल्सियस थियो । आज जुम्लाको न्यूनतम तापक्रम माइनस ६।५ डिग्री सेल्सियस मापन गरिएको छ । महाशाखाका अनुसार यस दिन वीरेन्द्रनगरको न्यूनतम तापक्रम ३।१, ताप्लेजुङको ३।५, डडेलधुराको ४।४, दिपायलको ५, ओखलढुंगाको ५।७, घोराहीको न्यूनतम तापक्रम ६ डिग्री सेल्सियस छ ।

महाशाखाले हरेक दिन बिहान न्यूनतम र बेलुका अधिकतम तापक्रम मापन गरी विवरण सार्वजनिक गर्ने गर्छ । हाल देशमा पश्चिमी न्यूनचापीय प्रणालीको आंशिक प्रभाव रहेको महाशाखाले जनाएको छ ।