एजेन्सी । युपीको सीतापुरमा बुधबार अबेर राति मजदुरले भरिएको बस सडकको खाल्डोमा पल्टिएको छ । बसमा महिला, पुरुष र बालबालिका गरी करिब ७० जना मजदुर सवार थिए । यस दुर्घटनामा २४ जनाभन्दा बढी मजदुर घाइते भएका छन् ।

बस मजदुर लिएर राति छत्तीसगढ जाँदै थियो । घाइते सबैलाई प्रहरी र गाउँलेहरूले बसबाट उद्धार गरी उपचारका लागि स्वास्थ्य केन्द्रमा भर्ना गरेका छन् । यो सबै घटना रेउसा थाना क्षेत्रको इटौरी गाउँसँग सम्बन्धित छ । बाक्लो हुस्सुका कारण यो दुर्घटना भएको बताइएको छ ।

वास्तवमा, रेउसा थाना क्षेत्र वरपरका गाउँहरूमा बसोबास गर्ने सबै परिवार मजदुरको रूपमा छत्तीसगढ जान्छन् । बुधबार साँझ सबै मजदुरहरू बस चढेर छत्तीसगढ जाँदै थिए । बसमा भिठाना, दलपतपुर, कुस्मोहरा गाउँका मजदुरहरु परिवारसहित सवार थिए ।

बस रेउसा–तम्बोर सडकको इटौरी गाउँ नजिकै पुग्दा कुहिरोका कारण मजदुरले भरिएको बस अनियन्त्रित भई सडकको खाल्डोमा पल्टिएको बताइएको छ । यस दुर्घटनामा २४ जनाभन्दा बढी महिला, पुरुष र बालबालिका घाइते भएका छन् ।

चिच्याएको सुनेर गाउँका बासिन्दा घटनास्थल पुगेर प्रहरीलाई खबर गरेका थिए । घटनास्थलमा पुगेको प्रहरीले गाउँलेसँग मिलेर उद्धार कार्य गरी खाल्डोमा खसेको बसबाट सबै मजदुरलाई बाहिर निकालेको थियो । घाइते सबैलाई एम्बुलेन्स र अन्य सवारी साधनबाट स्वास्थ्य केन्द्र पठाइएको छ ।

५ जनाको अवस्था गम्भीर
घटनाको जानकारी पाउनासाथ बसमा सवार मजदुरका परिवारसहित गाउँका सबै स्वास्थ्य केन्द्र पुगेका थिए । राति अबेरसम्म स्वास्थ्य केन्द्रमा अस्तव्यस्तताको वातावरण थियो ।

दुर्घटनामा काला गाउँका सन्तोष, नेकराम, सन्तराम, श्रीराम, राकेश भिठाना गम्भीर घाइते भएका उनीहरुलाई जिल्ला अस्पताल रिफर गरिएको छ भने बाँकी घाइते मजदुरको स्वास्थ्य केन्द्रमा नै उपचार भइरहेको छ ।