एजेन्सी । विश्व विजेता अर्जेन्टिनाका कप्तान लियोनल मेस्सीलाई फ्रेन्च क्लब पेरिस सेन्ट जर्मेन पीएसजी ले गार्ड अफ अनर प्रदान गरेको छ । विश्वकप पछि प्रशिक्षणमा फर्किएका मेस्सीलाई क्लबले उच्च सम्मान गरेको हो ।
घरेलु मैदान सेन्ट जर्मेन ओँ लेनमा नेइमारसहित सहकर्मी खेलाडीहरुले उभिएर मेस्सीलाई सम्मान गरेका गरेका थिए भने खेल स्टाफ लुइस कम्पोसले उनलाई गार्ड अफ अनरको ट्रफी हस्तान्तरण गरेका थिए ।
पीएसजीकै सहकर्मी खेलाडी तथा फ्रेन्च फर्वाड किलियन एम्बाप्पे भने समारोहमा अनुपस्थित थिए । प्रशिक्षणमा फर्किएपछि मेस्सीले आफूलाई गरेको स्वागतका लागि क्लबलाई धन्यवाद दिए ।
कीर्तिमानी ७ पटकका बालोन डिुओर विजेता मेस्सीको कप्तानीमा अर्जेन्टिनाले हालै कतारमा सम्पन्न विश्वकप फाइनलमा फ्रान्सलाई हराउँदै ३६ वर्षपछि विश्वकप जितेको हो । मेसीले विश्वकपमा उत्कृष्ट खेलाडी हुँदै गोल्डेन बल समेत जितेका थिए ।
सन् २०२१ मा बार्सिलोनाबाट फ्रि एजेन्टमा फ्रान्स पुगेका मेस्सीले कम्तिमा २०२३–२४ सिजन पीएसजीमा खेल्ने योजना बनाएका छन् । गार्ड अफ अनर सम्मानलाई खेलकुदमा विशिष्ट सम्मानमा रूपमा लिइन्छ ।
