काठमाडौं । जनता समाजवादी पार्टी, नेपालका अध्यक्ष उपेन्द्र यादवले पृथ्वीजयन्तीलाई पुन: स्थापित गर्नु जनआन्दोलनको मर्म र भावना विपरीतको कार्य भएको बताएका छन् । अध्यक्ष यादवले सामाजिक सञ्जालमार्फत् यस्तो बताएका हुन् ।
पृथ्वी जयन्तीलाई पुनस् स्थापित गर्नुले विविधतामा एकता नभइ विभेद, असमानता र विविधता उत्पन्न गर्ने उनको भनाइ छ । सरकारले पुस २७ गते सार्वजनिक बिदा दिने निर्णय गरेको छ । सोही निर्णयलाई लिएर जसपा अध्यक्ष यादवले आपत्ति जनाएका हुन् ।
सोमबार बसेको मन्त्रिपरिषद् बैठकले पुस २७ गते पृथ्वीजयन्तीको दिन बिदा दिने निर्णय गरेको हो । राष्ट्रिय प्रजातन्त्र पार्टीले सरकारलाई समर्थन गर्न पृथ्वीजयन्तीलाई राष्ट्रिय एकता दिवसको रूपमा मनाउनु पर्ने र सार्वजनिक बिदा दिनुपर्ने सर्त राखेको थियो ।
