काठमाडौं । नेकपा एमालेका नेता एवं सांसद महेश बस्नेतले मुलुकका धेरैजसो पद झापाली नेताहरुले पाउनु संयोग मात्र भएको बताएका छन् ।
‘प्रमुख पदहरुमा झापाली नै पर्नुपर्छ भन्ने छैन । योग्यतम मान्छे छनोट हुँदा जुन जिल्लाको पनि पर्न सक्छ नि । झापा जिल्ला वामपन्थी राजनीति अग्रणी र उद्भव स्थल हो । सभामुख देवराज घिमिरे र उपसभामुख उम्मेदवार इन्दिरा राना मगर झापाको पर्नुभयो । तर फरक लिंग र फरक पार्टीको हुनुहुन्छ । यो समयको कुरा हो । कोही कोही बेला इलामको मात्र पर्नुहुन्थ्यो । एमाले अध्यक्ष केपी शर्मा ओली, उपप्रधानमन्त्री राजेन्द्र लिङदेन, मुख्यमन्त्री हिक्मत कार्की, राष्ट्रिय सभाको नेता देवेन्द्र दाहाल पनि झापाकै पर्नु संयोग हो । यसमा झापाका जनताले धन्यवाद नै दिनुपर्छ,’ नेपाली रेडियो नेटवर्क ९एनआरएन० को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै बस्नेतले भने ।
सांसद बस्नेतले राष्ट्रपति पदमा सत्ता गठबन्धनका उम्मेदवारले जित्ने ठोकुवा पनि गरे । उनले भने, ‘राजनीतिमा इमानदारी र नैतिकताको कुरा महत्त्वपूर्ण हुन्छ । सभामुखमा पनि माओवादीले एमालेलाई मतदान गर्दैन भन्ने हल्ला चल्यो । तर त्यो झूट साबित भयो । त्यसैले अहिले हामी अड्कल नगरौं । कांग्रेसका मानिसले पनि एमालेका उम्मेदवारलाई गोप्य मत दिन सक्छ ।’
सात दलीय गठबन्धनमा कुनै दरार नआएको दाबी पनि उनले गरे । बस्नेतले भने, ‘जसपा र जनमत पार्टीका केही असन्तुष्टि प्रकट भएका छन् । तर यो सामान्य बहसको कुरा हो । अहिले घोषणा भएको छैन । गठबन्धनमा ब्रेक लोगेको छैन । कोही पुरानो सहयात्री घटक गए नयाँ घटक आइहाल्छ नि ।’