काठमाडौँ । राष्ट्रिय स्वतन्त्र पार्टी (रास्वपा) ले गृहमन्त्रालय नपाए सरकारबाट बाहिरिने तयारी थालेको छ । आइतबार नेपाली नागरिकता लिएपछि पुनस्गृहमन्त्री बन्ने दौडधूपमा लागेका रास्वपा सभापति रवि लामिछानेले मंगलबार बिहान पनि प्रधानमन्त्री पुष्पकमल दाहाल ‘प्रचण्ड’लाई भेटेका थिए । भेटमा गृहमन्त्रालयका लागि प्रधानमन्त्री दाहाल सकारात्मक नभएपछि रास्वपाले सरकारबाट बाहिरिने तयारी थालेको स्रोतले जानकारी दिएको छ ।
स्रोतका अनुसार लामिछानेको नागरिकता विवादका कारण माओवादीका केही नेता उनलाई पुनस्गृहमन्त्रालय दिन तयार नभएको र बिहानको छलफलमा पनि माओवादी अध्यक्षसमेत रहेका प्रधानमन्त्री दाहाल सकारात्मक थिएनन् । यता, सरकारमा सहभागी दल नेकपा एमालेका अध्यक्ष केपी शर्मा ओली भने उनै रविलाई नै पुनस् गृहमन्त्री बनाउन सहमत छन् ।
गत मंसिर ४ गते सम्पन्न प्रतिनिधिसभा निर्वाचनमा २० सिट जितेको रास्वपाले सरकारमा सहभागी हुँदा उपप्रधान तथा गृह मन्त्रालयसहित चार मन्त्रालय पाएको हो । सर्वोच्च अदालतले माघ १३ गते शुक्रबार रविको नागरिकता अवैध भएको फैसला गरेपछि लामिछाने पद तथा जिम्मेवारीबाट बाहिरिएका थिए ।
चितवन( २ बाट निर्वाचित लामिछानेको सांसद् पद खारेज भएपछि सो क्षेत्रमा उपनिर्वाचन हुँदैछ। रविले पुनस् उम्मेदवारी दिने तयारी थालेका छन् । यद्यपि निर्वाचन आयोगले भने निर्वाचनको मिति निर्धारण गरेको छैन ।
