काठमाडौं । नेपाल कमर्शियल आर्टिष्ट संघका अध्यक्ष चन्द्रप्रकाश राजवंशीले स्थानीय सरकारले लगाएको कर तिर्न नसकिने बताएका छन् । संघ अन्तर्गतको नेपाल सटर तथा भित्तेलेखन कला समितिले आयोजना गरेको वृहत अन्रक्रिया कार्यक्रमा बोल्दै अध्यक्ष राजवंशीले कमाइभन्दा कयौँ गुणा बढी कर लगाएकाले तिर्न नसकिने बताएका हुन् ।

‘प्रति स्कायर फिट २० रुपैयाँमा काम गरेर १५० रुपैयाँ कर तिर्न सकिदैन । यसका विरुद्धमा सबै व्यवसायी एक भएर आन्दोलनमा जानु पर्छ,’ उनले भने । आफूले सरकारी कर्मचारीलाई १ लाख रुपैयाँ कमाएर १० लाख रुपैयाँ कर तिर्न सक्नु हुन्छ भन्दा सकिदैन भनेको स्मरण गराउँदै अध्यक्ष राजवंशीले यस विषयमा स्थानीय सरकारलाई बुझाउन आवश्यक रहेको धारणा व्यक्त गरे । राज्यले यो पेशामा लागेकाहरुलाई पेशाबाट पलायन बनाउन खोजेको उनको आरोप थियो ।

सबै व्यवसायीहरु संगठित भएर यस्ता व्यवसायीलाई समस्या पार्ने नियमका विरुद्धमा आन्दोलन गर्नु पर्ने उनको भनाइ छ । एकजुट हुन नसकेको अस्थामा यस्ता विविध विषयमा कडा रुपमा प्रस्तुत हुन नसकिने भएकाले सबै एकजुट हुन आवश्यक रहेको उनले बताए ।

त्यस्तै संघका सल्लाकार दिलिप कुमार राईले जनप्रतिनिधि, कर्मचारी र एजेण्डका कारण समस्या आएको बताए । यो मालिक र श्रमिक दुवैको संस्था भएकाले यसले सबैको हकहितका लागि काम गर्ने धारणा व्यक्त गरे । विचौलियाले कर बढाएको भन्दै यसमा कर्मचारी र विचौलियाका हात हुन सक्ने बताए । स्थानीय सरकारले आवश्यकता अनुसार आफ्नो परिधि भित्र आफैले कानुन बनाएर कार्यान्वय गर्न सक्ने भएकाले स्थानीय सरकारले बनाउने कानुनका विषयमा जानकारी लिनु पर्ने बताए ।

‘व्यवसायीहरुले प्रविधिमा पनि पहुँच कायम गर्नु पर्ने उनको भनाइ थियो । अहिलेको बजारको अवस्था अनुसार यो क्षेत्रको ज्याला बढेको छैन । तर कर भने बढाइएको छ । यसले व्यवसायीहरु मर्कामा परेका छन्,’ उनले भने ।

त्यस्तै व्यवसायी धर्मराज थापाले कर बढाएर राज्यल हाम्रो काम खोसेको आरोप लगाए । स्थानीय सरकारले रोजगार दिनुको साटो उल्टो रोजगारी खोस्ने काम गरेको उनको दाबी थियो । अर्को तर्फ व्यवसायी बीचको अस्वस्थ प्रतिस्पर्धा भएकाले पनि समस्या भएको उनको भनाइ छ । त्यस्तै अर्का व्यवसायी राम रेग्मीले अहिले व्यवसाय बन्द गर्नु परेको र रोजगारीमा जोडिएकाहरु पनि वेरोजगार बनेको बताए । यो पेसामा रहेकाहरु अहिले विदेश पलायन भइरहेको उनको भनाइ थियो ।

कार्यक्रममा डिजिटल बोर्ड एसोसिएसनका अध्यक्ष महोन कार्कीले समस्या समाधानका लागि सबै एक जुट हुनु पर्ने धारणा व्यक्त गरे । ‘एकतामा नै बल हुन्छ सबै एक भएको खण्डमा समस्या समाधान गर्न सकिन्छ,’ उनले भने । कार्यक्रममा करिब ७० जनाको उपस्थिति रहेको थियो ।