काठमाडौं । घरको तीन तलामाथिबाट खसेर खोटाङको साकेला गाउँपालिका-१ बाँझेच्यानडाँडाकी सात वर्षीया बालिका रोशनी गुरुङको मृत्यु भएको छ । भाडाको घरबाट खसेकी रोशनीको उपचारको क्रममा मृत्यु भएको हो ।

दिक्तेल इंग्लिस बोर्डिङ स्कुल दिक्तेलको कक्षा-२ मा अध्ययनरत रोशनी अपराह्न ४ बजेतिर तीन तलामाथिबाट लडेकी थिइन् । पक्की घरको तीन तलामाथिबाट लडेर झरेलगत्तै उद्धार गरेर दिक्तेलस्थित फेमिली केयर अस्पताल पुर्‍याइएकी रोशनीको उपचारको क्रममा साँझ मृत्यु भएको प्रहरीले जनाएको छ ।

‘स्कुलबाट आएर खाजा खाएपछि साथीसँग खेल्ने क्रममा लडेर झरेकी हुन् । मृतक रोशनी रविन गुरुङ र सिर्जना राई गुरुङकी कान्छी छोरी हुन् । बुबा रविन जिल्लामै भाडाको सुमो गाडी चलाउँदै आएका छन् भने आमा सिर्जना कोठा भाडामा लिएर छोराछोरी पढाउँदै दिक्तेलमै बस्दै आएकी छिन् ।

प्रेमविवाह गरेका रविन र सिर्जनाको तीन सन्तान दुई छोरी र एक छोरा जन्मिएका थिए । ठूली छोरी रोमीको गत साउन १३ गते शुक्रबार भाडाकै घरको निदाल (घरका दलिन अड्याउन राखिने काठ) मा सल बाँधेर पिङ खेल्ने क्रममा सोही सलको पासो लागेर मृत्यु भएको थियो । वर्ष दिन नपुग्दै दुई छोरीको एकपछि अर्को हुँदै दुर्घटनामा परी मृत्यु भएपछि गुरुङ दम्पती शोकमा डुबेको छ ।