रौतहट । रौतहटको मौलापुर नगरपालिकामा असहायसँग मेयर कार्यक्रम लोकप्रिय बनेको छ । केही दिन अघि मौलापुर नगरपालिका ६ पथराका विजय गिरीको छोरीको विवाहमा सहभागी भई मेयर रिना कुमारी साहले विवाह मण्डपमै सहयोग रकम ३० हजार रुपैयाँको चेक हस्तान्तरण गरेकी हुन् ।

नगरका सम्पूर्ण विपन्न परिवारको २० वर्ष उमेर पुगेका छोरीको विवाहमा सहयोग गर्ने प्रतिबद्धता जनाउँदै मेयर साहले विवाहभन्दा एक हप्ता अगाडी विवाहको कार्डसहितको फाइल पेस गर्न आग्रह गरिन् । नियम पूरा गरेका फाइलकै आधारमा विवाहकै दिन बेहुलीको घरमै अनुदान रकमको चेक उपलब्ध गराउने उनले जानकारी दिइन् ।

महिला मेयर रिना कुमारी साहको योजना र सक्रियताले नगरवासी माझ असहायसँग मेयर कार्यक्रम लोकप्रिय बनेको हो । असहायसँग मेयर कार्यक्रम अन्तर्गत मौलापुर नगरपालिकामा छोरीको बिहेको लागि आर्थिक वर्ष २०७९/०८० मा ५० परिवारलाई आर्थिक सहयोग गरिएको छ ।

वि.सं. २०७९ सालको स्थानीय निर्वाचनमा दोश्रो पटक मौलापुर नगरपालिकाको मेयर पदमा निर्वाचित भएकी साहलाइ निर्वाचन आयोगको गत असोज २९ गतेको निर्णय एवम् ३० गतेको सूचनाबाट मेयर पद रिक्त भएको सूचना निकालेको थियो । मेयर साहले सर्वोच्च अदालतको गत कार्तिक २४ को फैसला बमोजिम गत ५ गते पुनः कार्यभार सम्हालेकी हुन्।