राजविराज । घरेलु तथा साना उद्योग कार्यालय राजविराजमा बुधबार पानी पस्दा जलमग्न भएको छ । बुधबारदेखि भएको वर्षाका कारण कार्यालय जलमग्न भएपछि कामकाज नै प्रभावित बनेको छ । कार्यालय परिसरमा वर्षाको पानी जमेर आवतजावतमा समेत समस्या भएपछि पम्पिङसेट लगाएर पानी फाल्नुपरेको घरेलु तथा साना उद्योग कार्यालय राजविराजले जनाएको छ ।
वर्षाको पानी कार्यालय प्रमुख आवास, स्टोर शाखा, फायल फाँट, स्टाप कोठामा छिरेका कारण काम गर्नमा समस्या भएको कार्यालय प्रमुख रेखाकुमारी यादवले जानकारी दिइन् । सम्भावित वर्षालाई मध्यनजर गरी कोठाभित्र पानी नछिरोस् भन्ने हेतु प्रारम्भीक चरणको मर्मत कार्य गर्दासमेत वर्षा भएपछि पानी रोक्न नसकिएको कार्यालय प्रमुख यादवले बताइन् ।गत वर्ष पनि यस्तै समस्या भोग्न परेको र तत्कालका लागि टस हालेर छुट्टै भवन निर्माण थालनी गरिएको भएपनि बजेट अपुग भएर काम अधुरै रहेको कार्यालय प्रमुख यादवको भनाइ छ ।
स्टोर शाखा प्रमुख शाखा अधिकृत कमलनारायण साहले कोठाभरी पानी जमेका कारण कागज पत्रलाई सुरक्षित राख्नसमेत समस्या भइरहेको बताए । वर्षाबाट भोग्नुपरेको समस्याका बारेमा मन्त्रालयलाई समेत पटक पटक जानकारी गराउँदा पनि अहिलेसम्म केही व्यवस्था नभएको स्टोर शाखा प्रमुख साहले जानकारी दिएका छन् । पुरानो भवन हुनुका साथै सडकभन्दा कार्यालय परिसरको लेबल तल रहनाले वर्षा हुनासाथ घरेलु तथा साना उद्योग कार्यालय जलमग्न हुँदै आएको छ ।
