काठमाडौं । प्रधानमन्त्री केपी शर्मा ओली अभिनित चलचित्र ‘नमेटिने घाउ’ फ्लप भएको छ । पूर्वप्रधानमन्त्री माधवकुमार नेपाल, सांसदद्वय देवेन्द्र पौडेल र ज्ञानेन्द्र शाहीले समेत अतिथि भूमिका निभाएको उक्त चलचित्र फ्लप भएको हो । स्रोतका अनुसार चलचित्रले दुई करोड लगानी डुबाएको हो ।

अभिनेता रंमित ढुंगानाले निर्देशन गरेको यस चलचित्रको प्रचार प्रसारका लागि कुनै कसर बाँकी राखिएको थिएन । गत शुक्रबार प्रदर्शनमा आएदेखि हलमा दर्शकको संख्या शून्य हुँदै गएको बताइएको छ । प्रदर्शनको आज चौथो दिनमा आइपुग्दा हलमा चलचित्र हेरेर प्रतिक्रिया दिने दर्शकको अभाव देखिएको बताइन्छ ।

चलचित्र डुबेपछि यतिबेला निर्माता समेत रहेका निर्देशक ढुंगाना तनावमा छन् । चलचित्र बनाउँदा लगानी गरेको दुई करोड स्वाहा भएको उनको भनाई छ । उसो त सामाजिक सञ्जालमा चलचित्रको राम्रै चर्चा भएको थियो । तर हलमा भने दर्शक देखिएनन् ।

चलचित्र सामाजिक कथावस्तुमा केन्द्रित भएपनि दर्शकमा राजनीतिक विषय वस्तु हो कि भन्ने भ्रम सिर्जना भएर नचलेको रमितको अनुमान छ । फिल्म नचल्दा अमेरिकामा भएकी श्रीमतिले पनि गाली गरेको उनको दुःखेसो छ ।