काठमाडौँ । सर्लाहीमा मापसे चेकजाँचका क्रममा प्रहरी र स्थानीयबीच झडप भएपछि स्थिति नियन्त्रणमा लिन प्रहरीले पाँच राउण्ड हवाई फायर गरेको छ। रामनगर गाउँपालिका–५ को वैजनाथ चोकमा मापसे चेकिङमा खटिएको प्रहरी टोली र स्थानीय युवाबीच विवाद हुँदा तनावको अवस्था सिर्जना भएको थियो। प्रहरी निरीक्षक उज्वल कार्कीको नेतृत्वमा ११ जनाको टोली नयाँरोड–मधुवनी सडकखण्डमा सवारी साधन र मापसे जाँचमा खटिएको थियो।

मधेश प्रदेश प्रहरीका प्रवक्ता एसपी सुवास बोहोराका अनुसार गएराति करिब ९ बजे सो क्रममा प्रहरीमाथि आक्रमण भएपछि स्थिति नियन्त्रण गर्न हवाई फायर गर्नुपरेको थियो।

यही क्रममा रामनगर गाउँपालिका–५ का वडाध्यक्ष श्रीनन्दन यादवको नेतृत्वमा करिब १५० जनाको टोलीले चेकजाँच अवरोध गर्ने प्रयास गरेका थिए। प्रहरी र स्थानीयबीचको झडपका क्रममा वडाध्यक्ष यादवको समूहले चौकी घेराउ गर्ने प्रयास गरेका थिए। झडपका क्रममा प्रहरी हवल्दार शैलेन्द्र राय घाइते भएका छन्। उनको टाउकोमा चोट लागेको छ र जनकपुरस्थित न्यूरो अस्पतालमा उपचार भइरहेको छ।

प्रहरीका अनुसार वडाध्यक्ष श्रीनन्दन यादव स्वयं मादक पदार्थ सेवन गरेर घटनास्थलमा पुगेका थिए। तनाव चुलिएपछि स्थिति नियन्त्रण गर्न डीएसपीको कमाण्डमा थप प्रहरी टोली परिचालन गरिएको थियो। पाँच राउण्ड हवाई फायर गरेपछि स्थिति नियन्त्रणमा आएको प्रहरीले जनाएको छ।