सरकारले आगामी आर्थिक वर्ष २०७३/०७४ को आय व्ययको विवरण बजेट आज शनिबार व्यवस्थापिका संसदमा प्रस्तुत गर्दैछ ।
अर्थमन्त्री विष्णु पौडेलले अपराहन् ४ बजे ससंदमा बजेट प्रस्तुत गर्नेछन् । यसपटक सरकारले १० खर्ब २५ अर्बभन्दा बढीको बजेट प्रस्तुत गर्नेभएको स्रोतले जनाएको छ । गत आर्थिक वर्षभन्दा झन्डै दुई खर्ब बढीको बजेट ल्याउन लागिएको हो । सामाजिक सुरक्षा भत्तामा वृद्धि, ठूला पूर्वाधारमा लगानी आदिका कारण बजेटको आकार बढेको जनाइएको छ । अघिल्लो वर्षको तुलनामा यो वर्षको आकार २ खर्बले बढी हो ।
ठूलो आकारको बजेट कार्यान्वयनमा समस्या हुन सक्ने भन्दै अर्थविद्हरुले सरकारको ध्यानाकर्षण गराएका छन् । स्वास्थ्य बीमा, सामाजिक सुरक्षा खर्चमा वृद्धि, किसानलाई पेन्सन, कर्मचारीको तलव बृद्धि, जलविद्युत, सडकजस्ता पूर्वाधारमा ठूलो लगानी आदि कारणले बजेटको आकार बढेको छ । सरकारले आगामी आर्थिक वर्षमा आर्थिक वृद्धिदर ६ प्रतिशत भन्दा बढी पुर्याउँने दावी गरेको छ । भारतको नाकाबन्दीका कारण यसपटक नेपालको आर्थिक वृद्धिदर ० दशमलव ७७ प्रतिशतमा खुम्चिएको छ ।