taja news Archives - Jankari Kendra

प्रतिनिधिसभा निर्वाचनमा मतदाता १० लाखभन्दा बढीले वृद्धि, दलको संख्या कति पुग्यो ?

जानकारी केन्द्र — Mon, 22 Dec 2025 10:21:20 +0000

काठमाडौं । देशभर आगामी प्रतिनिधिसभा निर्वाचनका लागि मतदाताको संख्या १० लाख १६ हजार ७ सय ५४ ले वृद्धि भएको छ। सोमबार सिंहदरबारमा आयोजित सर्वपक्षीय छलफलमा निर्वाचन आयोगका सहसचिव एवं प्रवक्ता नारायणप्रसाद भट्टराईले यो जानकारी दिएका हुन्।
उनका अनुसार हाल प्रतिनिधिसभा सदस्य निर्वाचन प्रयोजनको लागि निर्वाचन आयोगमा दर्ता भएका दलको संख्या ११४ पुगेको छ। गत २०७९ सालको निर्वाचनमा ८७ दलले निर्वाचनमा भाग लिएका थिए। आयोगले दलको संख्या बढेसँगै निर्वाचनमा प्रतिस्पर्धा बढ्ने अनुमान पनि गरेको छ।
भट्टराईले निर्वाचनमा प्रयोग हुने ५१ प्रकारका सामग्री पहिचान गरिसकेको जानकारी दिए। तीमध्ये ३७ वटा सामग्री जिल्लास्तरबाट खरिद गरिने र बाँकी १४ वटा मात्र आयोगले खरिद गर्ने गरी काम भइरहेको छ। उनले भने, “मतपेटिका र मसीको मौज्दात पर्याप्त भएकाले अन्य सामग्री नपुग्ने अवस्थामा मात्र खरिद प्रक्रिया अघि बढाइन्छ। यसले स्रोतको बचत गर्दै मितव्ययी रूपमा निर्वाचन सम्पन्न हुने अपेक्षा गरिएको छ।”
मतदाता नामावलीको अन्तिम प्रकाशन पुस १५ मा हुने जनाउँदै उनले विदेशी र अन्तरजिल्ला मतदानको तयारी समेत भइरहेको जानकारी दिए।

The post प्रतिनिधिसभा निर्वाचनमा मतदाता १० लाखभन्दा बढीले वृद्धि, दलको संख्या कति पुग्यो ? appeared first on Jankari Kendra.

सुनचाँदीको मूल्यमा नयाँ ऐतिहासिक रेकर्ड, कतिमा हुँदैछ कारोबार ?

जानकारी केन्द्र — Mon, 22 Dec 2025 05:54:15 +0000

काठमाडौं । सुनचाँदीको मूल्यले नयाँ रेकर्ड कायम गरेको छ । आज सुनको मुल्य प्रतितोला ३ हजार ४ सय रुपैयाँले बढेको छ। नेपाल सुनचाँदी व्यवसायी महासंघका अनुसार आज सुन प्रतितोला २ लाख ६१ हजार ७ सय रुपैयाँमा कारोबार भइरहेको छ। यो मूल्य हालसम्मकै उच्च हो ।
गत सोमबार सुनको मुल्यले बनाएको रेकर्ड ठीक एक सातामा आज तोडिएको छ । गत सोमबार त्यसअघिका सबै रेकर्ड तोड्दै प्रतितोला २ लाख ६० हजार ७ सय रुपैयाँमा सुनको कारोबार भएको थियो ।
त्यस्तै, चाँदीको मुल्यले केही दिनयता निरन्तर नयाँ रेकर्ड बनाइरहेको छ । चाँदीको मूल्य प्रतितोला १ सय ३० रुपैयाँले बढेको छ। आज चाँदीको मूल्य प्रतितोला ४ हजार २ सय ३५ रुपैयाँमा कारोबार भइरहेको महासंघले जनाएको छ । आईतबार चाँदीको मूल्य ४ हजार १ सय ५ रुपैयाँमा कारोबार भएको थियो ।

The post सुनचाँदीको मूल्यमा नयाँ ऐतिहासिक रेकर्ड, कतिमा हुँदैछ कारोबार ? appeared first on Jankari Kendra.

‘नेपाल उड, इन्टेरियर तथा फर्निचर अन्तर्राष्ट्रिय प्रदर्शनी २०८२’ सफलतापूर्वक सम्पन्न

जानकारी केन्द्र — Sun, 21 Dec 2025 13:26:47 +0000

काठमाडौं । मिडिया स्पेस सोलुसन्स प्रा.लि. र फ्युचरेक्स ट्रेड फेयर एण्ड ईभेन्टस् प्रा. लि.ले संयुक्त रुपमा आयोजना गरेको इन्टेरियर, फर्निचर, प्लाइउड, ल्यामिनेट, होम टेक्सटायल, हार्डवेयर, काष्ठ सम्बन्धि मेसिनरी तथा औजार, फर्निसिङ, म्याट्रेस, कच्चा पदार्थ तथा उत्पादनहरु सम्बन्धि बृहत अन्तर्राष्ट्रिय प्रदर्शनीेको एघारौँ संस्करण ‘११औं नेपाल उड इन्टरनेसनल एक्स्पो’ तथा ‘नेपाल इन्टेरियर एन्ड फर्निचर एक्स्पो’ पुष ६ गते आईतबार सम्पन्न भएको छ ।
शुक्रबार उद्धाटन गरिएको प्रदर्शनीमा स्वदेशी तथा बिदेशी ख्याती प्राप्त ब्राण्डहरुका १०० भन्दा बढि स्टलहरु राखिएको थियो । फनिर्चर, प्लाइउड तथा काठ औजारका कम्पनीहरु, ल्यामिनेट, विभिन्न कम्पनिका डिलर, सब डिलर र बिक्रेताहरुले काठ व्यवसाय संग सम्बन्धित उत्पादनहरुको बारेमा जानकारी गराउन र यस क्षेत्रका नयाँ प्रविधिको जानकारी गराउनको लागि यो प्रदर्शनी बिगत ११ वर्ष देखी कोसेढुंगा सावित हुँदै आएको आयोजकको भनाइ छ ।

प्रदर्शनीको सहयोगी संस्था नेपाल हस्तकला महासंघका अध्यक्ष रविन्द्र शाक्य, सामुदायिक वन उपभोगता महासंघका अध्यक्ष ठाकुर भण्डारी, नेपाल वन पैदावार उद्योग व्यवसायी महासंघका अध्यक्ष दिनेश राज रेग्मी, नेपाल प्लाईउड उत्पादक संघका होम प्रसाद घिमिरे, र इन्टेरियर डिजाईनर एस्सोसियेशन नेपालका अध्यक्ष श्याम श्रेष्ठले संयुक्तरुपमा शुक्रबार दिउँसो कार्यक्रमको उद्धाटन गरे ।
यस एघारौंं नेपाल उड प्रदर्शनीमा आयोजकहरुले संसार भरका ख्याती प्राप्त कम्पनी तथा ब्रान्डलाई नेपाली बजारमा पनि अत्याधुनिक वस्तु तथा टेक्नोलोजीलाई स्वदेशी उद्योगहरुमा प्रयोग गराउन एउटा पहलका रुपमा लिएका छन् । आयोजकका अनुसार,यस प्रदर्शनीले साना देखि ठूला उद्योगसम्मलाई आफ्नो प्रयोग भइरहेका मेसिनहरुलाई उन्नयन गर्दै अझ बढि प्रभावकारी बनाउन मद्दत गरेको छ ।

प्रदर्शनी स्थलमा इन्टेरियर डिजाईनर एस्सोसियेशन नेपालका विज्ञहरु द्वारा विभिन्न शिर्षकमा २ दिने सेमिनार तथा गोष्ठी कार्यक्रम पनि आयोजना भएको थियो।
यो प्रदर्शनीले नेपालको काठ, फनिर्चर र इन्टेरियर क्षेत्रमा नयाँ प्रविधिका सामान भित्राउने तथा विदेशमा सफलतापुर्वक प्रयोग भएका यस क्षेत्रका नयाँ प्रविधिहरुलाई नेपाली बजारमा सजिलै उपलब्ध गराउन एउटा माध्यम बनाएको आयोजकको दाबी रहेको छ । यस प्रदर्शनीले नेपालमा भइरहेका काष्ठ वस्तु उत्पादन सम्बन्धि कार्यहरुमा पनि सकारात्मक भुमिका निर्वाह गरेको छ ।

घर तथा व्यवसायमा आवश्यक पर्ने सामानहरु ...

The post ‘नेपाल उड, इन्टेरियर तथा फर्निचर अन्तर्राष्ट्रिय प्रदर्शनी २०८२’ सफलतापूर्वक सम्पन्न appeared first on Jankari Kendra.

रिहा भएपछि चितवनमा रवि लामिछानेको विशेष सम्बोधन, ‘मिल्नुपर्नेहरु अन्तिममा मिलेरै छोड्छौं’

जानकारी केन्द्र — Sat, 20 Dec 2025 08:58:19 +0000

काठमाडौं । राष्ट्रिय स्वतन्त्र पार्टीका सभापति रवि लामिछाने रिहा भएपछि चितवनमा सार्वजनिक कार्यक्रममा सरिक भए । पार्टीले आयोजना गरेको चौविसकोठीको कार्यक्रममा उनले कारको हुटमा उभिएर सम्बोधन गरेका थिए ।
उनले सो क्रममा देशमा परिवर्तन चाहनेहरूलाई एकैठाउँमा ल्याउन आफू जस्तोसुकै त्याग गर्न पनि तयार रहेको बताए । तर, चुनावको लागि मात्रै हो भने सहकार्य नहुने उनको प्रतिक्रिया छ । उनले चितवनले आफूलाई सधैं न्याय गरेको पनि बताए । उनले परिवर्तनको लागि देशका मिल्नुपर्नेहरु एक ठाउँमा उभिने र मिलेरै छोड्ने पनि घोषणा गरे ।
लामिछानेले अब जेनजी युवा पुस्ताको साथ लिएर देश निर्माण गर्ने बताए । उनले भने,‘हामी चुनाव कुरेर बसेका थियौँ, तर जेन–जीले बीचमै सरकारलाई तागत देखाइदियो, सिंहदरबार पनि बनाउँला, न्यायालय पनि बनाउँला तर वर्षौँदेखि खोसिएको हाम्रो सपना कसले बनाउँछ ? म भन्छु–अब हामी बनाउँछौँ। जेन–जीको साथ बोकेर अब देश बनाउन हामी लाग्छौँ,रास्वपा लाग्छ ।’

The post रिहा भएपछि चितवनमा रवि लामिछानेको विशेष सम्बोधन, ‘मिल्नुपर्नेहरु अन्तिममा मिलेरै छोड्छौं’ appeared first on Jankari Kendra.

अमेरिकाले ‘डीभी लटरी’ कार्यक्रम गर्‍यो स्थगित

जानकारी केन्द्र — Fri, 19 Dec 2025 09:20:47 +0000

काठमाडौं । अमेरिकाले विविधता आप्रवासी भिसा कार्यक्रम (डीभी) अर्थात् ‘ग्रीन कार्ड लटरी’ योजना स्थगित गरेको छ। ब्राउन युनिभर्सिटीमा भएको गोलीकाण्डमा दुई जनाको ज्यान गएपछि अमेरिकी राष्ट्रपति डोनाल्ड ट्रम्पले उक्त योजना रोक्ने निर्णय गरेका हुन्।
घटनासँग सम्बन्धित संदिग्ध ४८ वर्षीय पोर्चुगिज नागरिक क्लाउडियो नेभेस भालेन्ते बिहीबार मृत अवस्थामा फेला परेका थिए। उनी सन् २०१७ मा डीभी कार्यक्रममार्फत अमेरिका प्रवेश गरी ग्रीन कार्ड पाएका थिए। अमेरिकी अधिकारीहरूका अनुसार भालेन्तेले यसै हप्ता पोर्चुगिज मूलका म्यासाचुसेट्स इन्स्टिच्युट अफ टेक्नोलोजी (एमआईटी) का प्राध्यापक नुनो लुरेइरोको पनि हत्या गरेको विश्वास गरिएको छ।
होमल्यान्ड सेक्युरिटी सचिव क्रिस्टी नोएमले राष्ट्रपति ट्रम्पको निर्देशनअनुसार डीभी भिसा योजना स्थगित गरिएको जानकारी दिएकी छन्। “अब कुनै पनि अमेरिकीलाई हानि नहोस् भन्ने सुनिश्चित गर्न यस्तो निर्णय गरिएको हो,” उनले बताइन्।
डीभी कार्यक्रमअन्तर्गत अमेरिकामा आप्रवासन दर कम भएका देशका आवेदकहरूमध्येबाट चिठ्ठा प्रणालीमार्फत हरेक वर्ष अधिकतम ५० हजार भिसा प्रदान गरिँदै आएको छ। यस कार्यक्रममार्फत नेपालीहरू पनि अमेरिका जाने र ग्रीन कार्ड प्राप्त गर्ने गरेका छन्। योजना स्थगित भएसँगै नेपाली आवेदकहरू समेत प्रभावित हुने भएका छन्।

The post अमेरिकाले ‘डीभी लटरी’ कार्यक्रम गर्‍यो स्थगित appeared first on Jankari Kendra.

घट्यो सुनचाँदीको मुल्य,कतिमा हुँदैछ कारोबार?

जानकारी केन्द्र — Fri, 19 Dec 2025 06:13:04 +0000

काठमाडौं । आज सुनको मुल्य तोलामा २ हजार रुपैयाँ घटेको छ । नेपाल सुनचाँदी व्यवसायी महासंघका अनुसार सुनको मुल्य प्रतितोला २ लाख ५८ हजार ४ सय रुपैयाँमा कारोबार भइरहेको छ ।
अघिल्लो दिन सुनको मुल्य २ लाख ६० हजार ४ सय रुपैयाँमा कारोबार भएको थियो। गत सोमबार सुनको मुल्य हालसम्मकै उच्च २ लाख ६० हजार ७ सय रुपैयाँ पुगेको रेकर्ड छ ।
यता,चाँदीको मुल्य पनि तोलामा ७५ रुपैयाँ घटेको छ । अघिल्लो दिन प्रतितोला ४ हजार ८५ रुपैयाँमा कारोबार भएको चाँदीको मुल्य आज ४ हजार ५ रुपैयाँमा कारोबा भइरहेको महासंघले जनाएको छ । अघिल्लो दिनको चाँदीको मुल्य हालसम्मकै उच्च रहेको थियो ।

The post घट्यो सुनचाँदीको मुल्य,कतिमा हुँदैछ कारोबार? appeared first on Jankari Kendra.

चाँदीको मूल्यमा नयाँ ऐतिहासिक रेकर्ड, सुनको मूल्य पनि बढ्यो : कतिमा हुँदैछ कारोबार ?

जानकारी केन्द्र — Wed, 17 Dec 2025 06:21:43 +0000

काठमाडौं । चाँदीको मूल्यले नयाँ रेकर्ड कायम गरेको छ । आज चाँदीको मूल्य प्रतितोला १ सय ७० रुपैयाँले बढेको छ। नेपाल सुनचाँदी व्यवसायी महासंघका अनुसार चाँदीको मूल्य प्रतितोला ४ हजार ५५ रुपैयाँ रुपैयाँमा कारोबार भइरहेको छ । अघिल्लो दिन चाँदीको मूल्य ३ हजार ८ सय ८५ रुपैयाँमा कारोबार भएको थियो।
सुनको मूल्य पनि बढ्दै प्रतितोला २ लाख ५९ हजार ७ सय रुपैयाँ कायम भएको महासंघले जनाएको छ। अघिल्लो दिन सुन २ लाख ५९ हजार रुपैयाँमा कारोबार भएको थियो। यसअघि सोमबार सुनको मूल्य हालसम्मकै उच्च २ लाख ६० हजार ७ सय रुपैयाँ पुगेको थियो।

The post चाँदीको मूल्यमा नयाँ ऐतिहासिक रेकर्ड, सुनको मूल्य पनि बढ्यो : कतिमा हुँदैछ कारोबार ? appeared first on Jankari Kendra.