आज छानबिन विशेष समितिको प्रतिवेदन सदनमा पेश गरिने..

काठमाडौं । संसदीय विशेष समितिले सभामुख अग्निप्रसाद सापकोटालाई आज दिउँसो ३ बजे प्रतिवेदन बुझाउने समय तय गरेको छ ।

उक्त प्रतिवेदन सभामुखलाई बुझाएपछि सदनमा पेश गरिने जनाइएको छ । तोकिएको म्याद बिहीबार नै सकिएको थियो । जेष्ठ सदस्यको हैसियतमा समितिको संयोजकत्व गरेका लक्ष्मणलाल कर्णले सभामुखलाई प्रतिवेदन बुझाउनेछन् । संसद सचिवालयले संसद भवन नयाँ वानेश्वरमा सभामुखलाई प्रतिवेदन बुझाइने जानकारी दिएको छ ।

प्रतिनिधिसभाको जारी बैठकलाई स्थगित गरेर आजै अर्को बैठक राख्ने, पहिलो बैठक स्थगित गरेर छानबिन समितिको प्रतिवेदन सभामुखले बुझेर दोस्रो बैठकमा पेश गर्ने तयारी छ । करको दर हेरफेर गर्न अनधिकृत व्यक्तिको प्रवेश भएको भनी प्रश्न उठेपछि २२ असारमा ११ सदस्यीय समिति गठन भएको थियो । सुरुको १० दिनको समय अपुग भएपछि साउन ५ गते ७ दिनको समय थप गरिएको थियो । समितिले प्राप्त समयमै छानबिन प्रतिवेदन सकेको छ ।

समितिले उक्त तयार प्रतिवेदनमा ‘अनधिकृत व्यक्तिको प्रवेश पुष्टि हुन नसकेको’ निष्कर्ष निकालेको छ ।