महानगरमा स्केट बोर्डिङ र बी बोइङ प्रवर्द्धन गर्न ‘यमबुद्ध पार्क’ बनिने

काठमाडौं । काठमाडौं महानगरपालिकाले दिवंगत र्‍यापर यमबुद्धको सम्झनामा वडा नम्बर १६मा ‘यमबुद्ध पार्क’ निर्माण गर्ने जनाएको छ ।

महानगरपालिकाले चालु आर्थिक वर्ष २०७९/८०को वाषिर्क बजेट तथा कार्यक्रम सार्वजनिक गर्दै पार्क बनाउन १ करोड ५० लाख रुपैयाँ बजेट छुट्याएको छ । महनगरको पूर्वाधार विकास विभागका एक अधिकारीले नयाँ पुस्तालाई बी बोइङ र स्केटबोर्डिङमा प्रोत्साहित गर्न शहरभित्र पूर्वाधारसहितको पार्क बनाउने योजना बनाएको जानकारी दिए ।

उनले ‘बी बोइङ’ ब्रेकडान्सिङ नृत्यको एउटा ऊर्जावान शैली रहेको बताए । जुन हिपहप संगीतमा प्रदर्शन गरिन्छ, कलात्मक फुटवर्क र एक्रोबेटिक वा एथलेटिक शैलीको नाच हो । त्यस्तै, स्केटबोर्डिङ भने पांग्रा जोडिएको स्केटमा हिंड्ने फरक शैलीको खेल हो ।

यसैगरी, महानगरपालिकाले बजेटमा नै यो रकम पार्क निर्माण, बास्केटबल कोर्ट, स्केट बोर्डिङ, बी बोइङसहितको पार्क बनाउने उल्लेख छ । बजेटमा अन्य संरचना पनि बनाउने भनिए पनि केके हुने भन्ने थप खुलाइएको छैन । यसअघि यमबुद्धको सलिक बनाउने घोषणामा मेयर साह विवादित बनेका थिए । महानगरवासीको आवश्यकता भन्दा आफ्नो व्यक्तिगत चाहनाको योजनामा बजेट राखिएको भन्दै बालेनको विरोध भएको थियो । फेसबुकमा स्टाटस लेख्दै बालेनले आफ्नो तलबको रकमबाट यमबुद्धको सालिक बनाउने घोषणा गर्नु परेको थियो ।

हाल प्रस्तावित युमबुद्ध पार्कमा अब यमबुद्धको सालिक रहने वा नहरने बारे बजेटमा उल्लेख गरिएको छैन ।