श्रीलङ्कामा इन्धन अभावको कारण विद्यालय बन्दको घोषणा

काठमाडौँ । श्रीलङ्कामा इन्धन अभावका कारण विद्यालय बन्दको घोषणा गरिएको छ ।

शिक्षा मन्त्रालयले सरकारको स्वामित्वमा रहेका र सरकारको स्वीकृतिमा सञ्चालन भएका सबै निजी विद्यालय बन्द गर्ने निर्णय गरिएको जनाएको छ । जुलाई ४ देखि एक साता पहिलो चरणको बन्द घोषणा गरिएको छ । विद्यालय बन्द भएपछि इन्धनको खपत कम हुने विश्वासले उक्त निर्णय गरिएको सरकारी अधिकारीले जनाए ।

आइतबार देशका ऊर्जा मन्त्रीले एक दिनका लागि मात्र इन्धनको सञ्चय रहेको जानकारी दिएका थिए । देशमा आर्थिक सङ्कट थप जटिल बन्दै गइरहेको छ । यस्तोमा, सरकारले इन्धन आयात नगर्दा सार्वजनिक यातायात ठप्प जस्तै भइसकेको अवस्था छ ।

श्रीलङ्काले पेट्रोल र डिजेल बचत गर्न भन्दै अत्यावश्यक सेवाबाहेक सबै क्षेत्रका लागि इन्धन बिक्री दुई साता रोक्ने घोषणा गरेको थियो । सोमबार बैंक तथा कार्यालयहरू पुनः खोलिँदा स्थिति खराब हुने अनुमानसहित अधिकांश पेट्रोल पम्प बन्द छन् ।

निजी बस सञ्चालक सङ्गठनका अध्यक्ष गेमुनु विजेराट्नेले करिब २० हजार बसमध्ये करिब एक हजार बस मात्र सञ्चालनमा रहेको बताए । विदेशी मुद्राको अभावले सबैभन्दा खराब आर्थिक सङ्कट ब्यहोरिरहेको यस मुलुकमा अति आवश्यक सामग्रीको आयातलाई पनि धान्न नसकेपछि २ करोड २० लाख जनताले कठिनाइ भोग्दै आएका छन् ।

देशले गत वर्षको अन्त्यदेखि रेकर्ड गरिएको उच्च मुद्रास्फीति र लामो विद्युत् ब्लाकआउटको पनि सामना गरिरहेको जनाइएको छ ।