स्ट्याण्डर्ड चार्टर्ड बैंकको नाफा ६२ प्रतिशतले बढ्यो, ईपीएस कति?

काठमाडौं । स्ट्याण्डर्ड चार्टर्ड बैंक लिमिटेडले प्रकाशित गरेको गत आ.व २०७८/७९ को चौथो त्रैमाससम्मको अपरिष्कृत वित्तिय विवरण अनुसार बैंकको नाफामा उल्लेख्य वृद्धि भएको छ ।

बैंकले गत आर्थिक वर्षको चौथो त्रैमाससम्म २ अर्ब २६ करोड ९८ लाख रुपैयाँ खुद नाफा कमाएको छ । जुन गत वर्षको सोही अवधिको तुलनामा ६२.२७ प्रतिशतले धेरै हो । बैंकले गत वर्षको यही अवधिमा १ अर्ब ३९ करोड ८८ लाख रूपैयाँ खुद नाफा कमाएको थियो । समिक्षा अवधिसम्म बैंकको खुद ब्याज आम्दानी पनि ४४.८६ प्रतिशतले बढेको छ भने बैंकको सञ्चालन मुनाफा पनि ६१.५४ प्रतिशतले बढेको हो । यही अवधिसम्म बैंकको वितरणयोग्य मुनाफा १ अर्ब ५९ करोड ३६ लाख रुपैयाँ रहेको छ ।

यसैगरी, बैंकको समिक्षा अवधिमा प्रतिसेयर आम्दानी अर्थात ईपीएस ७ रुपैयाँ ७५ पैसा बढेर २४ रुपैयाँ ७ पैसा पुगेको छ । बैंकको प्रतिसेयर नेटवर्थ १९२ रुपैयाँ रहेको छ ।