स्पेनमा तातो हावाबाट ५ सय जनाभन्दा धेरैको ज्यान गुम्यो

एजेन्सी । स्पेनमा हाल प्रचण्ड गर्मी भएर तातो हावा चलिरहेको छ । जसकारण मानिसहरुको ज्यान समेत गइरहेको स्पेनको स्वास्थ्य मन्त्रालयले जनाएको छ ।

स्पेनको मन्त्रालयले दिएको जानकारीअनुसार सोमबारसम्म तातो हावाबाट ज्यान जाने व्यक्तिको संख्या ५१० पुगेको छ । मन्त्रालयले यहाँको तापक्रम ४५ डिग्री सेल्सियससम्म पुगेको र गर्मीका कारण सम्बन्धित समस्याबाट मानिसहरुको ज्यान जाने क्रम पनि नरोकिएको जनाएको छ ।

स्पेनमा यही जुलाई १० तारिखदेखि गर्मी सुरु भएको हो । स्वास्थ्य मन्त्रालयले तातो हावा सुरु भएको हप्ता जुलाई १० देखि १६ तारिखसम्म मात्र यहाँ १५० जनाको ज्यान गएको जनाएको छ । यसपछि पनि तातो हावाको असरले ज्यान जाने क्रम नरोकिएको भन्दै अधिकारीहरुले सोमबारसम्म ५१० जनाको मृत्यु भएको बताए ।

यसरी ज्यान जानेमा अधिकांश ज्येष्ठ नागरिक रहेका छन् । उनीहरुमध्ये ३२१ जना ८५ वर्षभन्दा माथिका नागरिक थिए । गर्मी अझै बढ्ने देखिएको र यसबाट ज्यान जानेको संख्या थप बढ्न सक्ने भन्दै सतर्कता अपनाउन स्वास्थ्य मन्त्रालयले सूचना जारी गरेको छ ।