२४ घण्टामा १,७७३ चालक कारबाहीमा, ट्राफिकबाट ६ लाखभन्दा बढी राजस्व सङ्कलन

काठमाडौं । काठमाडौँ उपत्यकामा पछिल्लो २४ घण्टामा सवारी नियम उल्लङ्घन गर्ने एक हजार ७७३ चालक ट्राफिक कारबाहीमा परेका छन्। उक्त कारबाहीबाट राज्यकोषमा रु ६ लाख ४४ हजार ५०२ राजस्व सङ्कलन भएको छ।

काठमाडौँ उपत्यका ट्राफिक प्रहरी कार्यालयका अनुसार मादक पदार्थ सेवन गरेर सवारी चलाउने १०० जना, नियमविपरीत राइड सेयरिङ गर्ने ११८ जना, ट्राफिक सङ्केत बत्ती उल्लङ्घन गर्ने १३६ जना तथा तीव्र गतिमा सवारी चलाउने २३७ जनामाथि कारबाही गरिएको छ।

त्यसैगरी, लेन अनुशासन पालना नगर्ने ८२ जना, निषेधित क्षेत्रमा हर्न बजाउने ८९ जना, सडक पेटीमा सवारी पार्किङ गर्ने १२० जना, एकतर्फी सडकमा सवारी चलाउने ९१ जना तथा अन्य विभिन्न सवारी नियम उल्लङ्घन गर्ने ८०० जनालाई समेत कारबाही गरिएको कार्यालयले जनाएको छ।

ट्राफिक प्रहरीले सडक सुरक्षा र सवारी अनुशासन कायम गर्न नियमित अनुगमन तथा कारबाहीलाई निरन्तरता दिइरहेको जनाएको छ।