वर्षा र पहिरोले देशभरका प्रमुख राजमार्ग ठप्प,काठमाडौंका नाका अवरुद्ध

काठमाडौं। लगातारको अविरल वर्षा, बाढी र पहिरोका कारण देशभरका मुख्य राजमार्ग तथा सडक खण्डहरू नराम्ररी प्रभावित भएका छन्। नेपाल प्रहरीले सोमबार बिहान ६ बजे सार्वजनिक गरेको अद्यावधिक विवरणअनुसार बागमती, कोशी र कर्णाली प्रदेशका प्रमुख सडकहरूमा सवारी साधनको आवगमन पूर्ण रूपमा ठप्प भएको छ भने केही सडकमा रात्रिकालीन यात्रामा प्रतिबन्ध लगाइएको छ।

पृथ्वी राजमार्गअन्तर्गत धादिङको बेनिघाट रोराङ गाउँपालिका–७ स्थित कृष्णभिर र गजुरी गाउँपालिका–२ को परेवाभिरमा ठूलो पहिरो जाँदा काठमाडौँ जोड्ने यो मुख्य राजमार्ग पूर्ण रूपमा ठप्प बनेको छ। यस्तै सिन्धुपाल्चोकको भोटेकोशी गाउँपालिका–२ कोदारीस्थित अरनिको राजमार्गमा पहिरो खस्दा आवगमन रोकिँदा उत्तरी नाकातर्फको यातायात सम्पर्क विच्छेद भएको छ।

सम्भावित जोखिमलाई ध्यानमा राख्दै विभिन्न सडक खण्डमा रात्रिकालीन सवारी सञ्चालनमा कडाइ गरिएको छ। बीपी राजमार्गअन्तर्गत काभ्रेको खुर्कोट–नेपालथोक–कटुञ्जेबेँसी क्षेत्रमा बाढीको खतरा रहेकाले साँझ ६ बजेदेखि बिहान ४ बजेसम्म सवारी चलाउन रोक लगाइएको छ भने दिउँसो मौसमको अवस्था हेरेर मात्र यातायात सञ्चालन गर्न दिइनेछ। यसैगरी मकवानपुरको कान्ति लोकपथअन्तर्गत हेटौँडा–ठिङ्गन–बागमती–ललितपुर सडकमा पनि साँझ ६ बजेदेखि बिहान ५ बजेसम्म रात्रिकालीन यात्रा स्थगित गरिएको छ।

उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी सडक खण्ड बाढीले क्षति पुर्‍याएपछि लामो समयका लागि बन्द भएको छ। नुवाकोटको टोखा–छहरे सडक खण्डअन्तर्गत शिवपुरी गाउँपालिका–८ घट्टेखोलामा राति १० बजेदेखि बिहान ५ बजेसम्म सवारी सञ्चालनमा रोक लगाइएको छ भने पासाङ ल्हामु राजमार्गसहित जिल्लाका अन्य मुख्य सहायक मार्गहरू पनि बाढीका कारण अवरुद्ध छन्।

कोशी प्रदेशको इलामस्थित मेची राजमार्गअन्तर्गत इलाम नगरपालिका–९ राजदुवालीमा पहिरो जाँदा झापाबाट ताप्लेजुङ जोड्ने सडक पूर्ण रूपमा ठप्प भएकाले प्रहरीले वैकल्पिक बाटो प्रयोग गर्न आग्रह गरेको छ। उता कर्णाली प्रदेशको मुगुस्थित छायाँनाथ रारा नगरपालिका–७ झ्यारीखोला र टोक्ला क्षेत्रमा पहिरो जाँदा नाग्म–गमगढी सडक खण्ड पूर्ण रूपमा बन्द भएको छ।

प्रहरीका अनुसार सम्बन्धित निकायहरूसँगको समन्वयमा पहिरो हटाई अवरुद्ध राजमार्गहरू सुचारु गराउने प्रयास निरन्तर भइरहेको छ। मौसमप्रतिकूल रहेकाले यात्रामा निस्कनुअघि अनिवार्य रूपमा सडकको ताजा अवस्था बुझ्न र विशेष सतर्कता अपनाउन प्रहरीले सर्वसाधारणसँग अनुरोध गरेको छ।