“नयाँ जनवादी क्रान्ति गरेर संसदवादी व्यवस्था मिल्काएर फाल्छौं”

काठमाडौं, ९ वैशाख । नेपाल कम्युनिस्ट पार्टीका अध्यक्ष ऋषि कट्टेलले आफ्नो पार्टी स्थानीय तहको निर्वाचन सहभागी नहुने स्पष्ट पारेका छन् ।
नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै नेता कट्टेलले भने, “मोहन वैद्य किरण नेतृत्वको नेकपा (क्रान्तिकारी माओवादी), विश्वभक्त दुलाल (आहुति) नेतृत्वको वैज्ञानिक समाजवादी कम्युनिस्ट पार्टी र मेरो नेतृत्वको नेपाल कम्युनिस्ट पार्टीले स्थानीय तहको निर्वाचनमा सहभागी नहुने निर्णय गरिसकेका छौं । नेत्रविक्रम चन्द विप्लव नेतृत्वको नेकपाभित्र केही मतभेद छ । उपयोग गर्ने कि बहिष्कार गर्ने भन्ने छ ।”
नेता कट्टेलले आफ्नो पार्टी निर्वाचनभन्दा नयाँ जनवादी क्रान्तिको आधार तयार गर्न लागेको पनि बताए । उनले भने, “अहिलेको संविधान र संसदीय प्रणाली असफल भइसकेको छ । यस अन्तर्गत हुने निर्वाचनले नेपालको स्वतन्त्रताको रक्षा गर्न सक्दैन । समृद्धिको आकांक्षा पनि पूरा हुँदैन, जनताले न्याय र मुक्ति पनि पाउँदैनन् । त्यसैले हामी यो व्यवस्था मिल्काएर नयाँ जनवादी क्रान्तिको आधार तयार गर्न चाहन्छौं ।”
नेकपा अध्यक्ष कट्टेलले नेपालका सच्चा कम्युनिस्टहरुले संसदवादी व्यवस्थालाई कहिल्यै पनि नमानेको बताए । उनले भने, “वैचारिक रुपमा कम्युनिस्ट पार्टी दुइटा धारामा विभाजित छन् । एउटा संसद्वादी धारामा गयो । माओवादी केन्द्र र एमाले संसद्वादमा कसरी प्रभुत्व स्थापित गर्ने लडाइँमा छन् । अर्काे हामी संसदवादी धारालाई विस्थापित गरेर नयाँ जनवादी व्यवस्था ल्याउन चाहन्छौं । अब त्यसको विकल्प छैन ।”
उनले आज आफ्नो सहित तीन कम्युनिस्ट पार्टीले कम्युनिस्ट पार्टी स्थापना दिवस मनाउन लागेको पनि बताए । कट्टेलले थपे, “नेपाल कम्युनिस्ट पार्टी स्थापना दिवसका बारेमा पनि दुईथरी मत छन्, एक थरीले पुष्पलालले कम्युनिस्ट पार्टीको घोषणापत्र जारी गरेको दिनलाई स्थापना दिवस मानेका छन् । तर हामीले २२ अप्रिल अर्थात् लेनिन डेलाई नै कम्युनिस्ट पार्टी स्थापना दिवस मनाउँदै छौं ।”