सिरहाको बजार अनुगमनमा ५० हजारको म्याद गुज्रेको खाद्य नष्ट

अनुगमन टोलीले सिरहाको भगवानपुर र धनगढीमाई नगरपालिकाको बजारबाट करिब रु. ५० हजार मूल्यको म्याद गुज्रेको खाद्य पदार्थ नष्ट गरेको छ ।

खाद्य प्रविधि तथा गुण नियन्त्रण डिभिजन कार्यालय सप्तरी र घरेलु तथा साना उद्योग कार्यालय सिरहाको पहल संयुक्त अनुगमन टोली खटिएका थिए । सहर केन्द्रित बजार अनुगमनलाई केही दिनदेखि ग्रामीण क्षेत्रमा केन्द्रित गरिएको थियो ।

डिभिजन कार्यालय सप्तरीका प्रमुख सुरेशकुमार सिंहले भगवानपुर बजारका पसलहरुबाट म्याद गुज्रेको मैदा, मसला, पाउण्डर दूध, खानेतेल, सुर्ति, बिँडी, भुज, चिउरालगायतका सामान नष्ट गरेको बताए । साथै, सिरहाको धनगढीमाई –१० को धनगढी बजारका पसलहरुमा पनि म्याद गुज्रेको मैदा, खानेतेल, स्वायबिन, मसलालगायतका सामान नष्ट गरिएको जनाइएको छ ।

यसैगरी, विभिन्न होटल तथा मिष्ठान्न भण्डारमा हानिकारक रङको प्रयोग गरी बनाइएको मिठाई तथा म्याद गुज्रेको पेय पदार्थसमेत नियन्त्रणमा लिइएको थियो । यहीक्रममा मूल्यसूची नराखेका पसलमा पार्शव ढंगमा मूल्यसूची राख्न, म्याद गुज्रिएका खाद्यवस्तुको उच्च व्यवस्थापन गर्न तथा दर्ता नभएका पसल या व्यवसायीले दर्ता गराउन पहिलो चेतावनी पनि दिइएको जनाइएको छ ।