नेपालमा पनि द क्लिफमा स्काइ ग्लाइडिङ, कति छ शुल्क?

काठमाडौं । एड्भेन्चरका लागि प्रख्यात मानिने एवम् विश्वकै दोस्रो अग्लो बन्जी सञ्चालन गरिरहेको द क्लिफ प्रालिको रिसोर्ट परिसरमा नयाँ साहसिक खेल ‘स्काइ ग्लाइडिङ’ सञ्चालनमा आएको छ ।

यसको लागि १ सय मिटर जति लामो डोरीको दुईतर्फ टावर निर्माण गरिएको छ । तल्लो डोरीमा स्केटबोर्ड राखेर टेक्ने र शरीरमा हार्नेस बाँधेर क्याराविनरको मद्दतले फलामे डोरीमाथि घिर्नीमा झुण्डिँदै एक टावरबाट अर्को टावरसम्म चिप्लिँदै पुग्न सकिने जनाइएको छ ।

उक्त टावरमा दुईवटा डोरी हुँदा दुई जनासँगै खेल्न सकिन्छ । प्रतिव्यक्ति १ हजार २०० रुपैयाँ लाग्ने स्काइ ग्लाइडिङमा थ्रीसिक्स्टी क्यामेराले कैद गरेको फोटो र भिडियोसमेत प्राप्त गराइनेछ । द क्लिफ प्रालिका अध्यक्ष राजु कार्कीले एड्भेन्चरका पारखी आन्तरिक पर्यटकलाई नयाँ अनुभव दिने उद्देश्यले स्काइ ग्लाइडिङ सञ्चालनमा ल्याएको बताए ।

द क्लिफमा हाल बन्जी र स्विङका लागि प्रख्यात ११ वटा साहसिक खेल सञ्चालनमा छन् । स्काइ क्याफे, हर्स राइडिङ, स्काइ चियर, फ्यामिली पिङ, वसिङ ह्याण्ड, क्रेवी ब्रिज, जाइन्ट पिङ निकै लोकप्रिय छन् । त्यस्तै, स्काइ ग्लाइडिङ सञ्चालनमा आएपछि कुल १२ वटा साहसिक खेल सञ्चालनमा रहने जनाइएको छ ।