काठमाडौं । अखिल नेपाल फुटबल संघ (एन्फा)को कार्यसमिति बैठक आगामी साउन २ गते बस्ने जनाइएको छ ।
एन्फा महासचिव किरण राईका अनुसार आसन्न साफ महिला च्याम्पियनसिप, नेपाल सुपर लिग (एनएसएल) लगायत विभिन्न विषयमा छलफल गर्नका लागि कार्यसमिति बैठक बोलाइएको हो । अघिल्लो कार्यसमितिले एनएसएल आयोजनाका लागि आयोजकलाई भदौदेखि कात्तिकसम्मको अवधि उपलब्ध गराइसकेको छ । तर एन्फासँग छलफल गर्दै ए डिभिजनका असन्तुष्ट चार क्लबले एनएसएलसँगको सम्झौता नै रद्द गर्न सिफारिस गर्ने भएको छ । जसबारे कार्यसमितिमा छलफल हुने जनाइएको छ ।
साथै, कार्यसमिति बैठकमा केही पदाधिकारी मनोनित गर्ने र उमेर समूहको प्रतियोगिताको बारेमा पनि छलफल हुनेछ । त्यस्तै, साफ महिला च्याम्पियनसिप काठमाडौंमा वा बाहिर गर्ने बारे पनि बैठकले टुङ्गो लगाउनेछ । नेपाली राष्ट्रिय महिला फुटबल टिम एसियन गेम्सको लागि प्रशिक्षणमा छन् । त्यसैलाई अब साफ च्याम्पियनसिपको तयारीको रुपमा अघि बढाउने सम्भावना रहेको छ ।
यसैगरी, ए डिभिजनका चार क्लब थ्रीस्टार, मनाङ मर्स्याङ्दी, एनआरटी र संकटाले एन्फा पदाधिकारीलाई भेटेर एनएसएलसँगको सम्झौता रद्द गर्न सिफारिस गर्ने बारे छलफल गरेका थिए । जसलाई कार्यसमितको बैठकमा सिफारिस गरी छलफल गरिनेछ । ६ असारमा सम्पन्न निर्वाचनबाट पंकज विक्रम नेम्वाङको नेतृत्वमा नयाँ कार्यसमिति आएपछि एन्फाले एनएसको विषयमा क्लबहरुसँग छलफल गरेर अघि बढ्ने जनाएको थियो ।
