निर्मल पूर्जाको ‘फोर्टिन पिक्स’ एमी अवार्डमा मनोनित

काठमाडौं । नेटफ्लिक्सले कीर्तिमानी नेपाली आरोही निर्मल पूर्जामाथि निर्माण गरेको चर्चित डकुमेन्ट्री ‘फोर्टिन पिक्सः नथिङ इज इम्पोसिबल’ एमी अवार्डमा मनोनयन भएको छ ।

एमी टेलिभिजनतर्फको ओस्कार अवार्ड मानिन्छ । उक्त फिल्म आउटस्ट्यान्डिङ म्युजिक कम्पोजिसन फर अ डकुमेन्ट्री सिरिज अर स्पेसल विधामा छानिएको हो । जहाँ कम्पोजर नैनिता देसाई मनोनित भएकी छन् ।

देसाईले नेटफ्लिक्समा रिलिज भएलगत्तै समीक्षकबाट समेत ध्वनि रचनामा चर्चा पाएकी थिइन् । फिल्ममा उनले सगरमाथाको शून्यतामा ध्वनि सिर्जना गर्नुपर्ने चुनौती पार गरेर यो स्थान हासिल गरेकी छन् । अमेरिकाको लस एन्जलसमा सेप्टेम्बर १२ मा हुने समारोहमा विजेता घोषणा हुनेछ । अगस्ट १२ देखि २२ सम्म मतदानको प्रक्रिया रहेको छ ।

यस डकुमेन्ट्री फिल्मले पूर्जाले सात महिनाभित्रै कसरी ८ हजार मिटरभन्दा अग्ला संसारका १४ हिमाल आरोहण गरी भन्ने चित्रण गरेको छ ।