‘ऐंचो पैँचो’ को ट्रेलर हेरेपछि प्रेम आलेले भने- “म खेलेको भए राजनीतिका विकृति प्रष्ट्याउँथेँ”

काठमाडौं । नेपाली चलचित्र ‘ऐंचो पैँचो’को ट्रेलर सार्वजनिक भएको छ । सोमबार काठमाडौंमा एक कार्यक्रमबीच ट्रेलर सार्वजनिक गरिएको हो । सार्वजनिक ट्रेलरमा राजनीतिक कथा वस्तुलाई देखाइएको छ ।

राजनीतिक कथावस्तुमा आधारित चलचित्रमा स्वस्तिमा खड्का, मुकुन भुषाल, वर्षा राउत, सुशील सिटौला, कोशिस क्षेत्री, बुद्धि तामाङ लगायतका कलाकारहरुको मुख्य अभिनय रहेको छ ।

कृषा चौलागाईंद्वारा निर्देशित यो चलचित्रको ट्रेलरमा अभिनेत्री स्वस्तिमा भोटका लागि हात जोड्दै पर्चा बाँडिरहेको देख्न सकिन्छ । ट्रेलर सार्वजनिक कार्यक्रममा बोल्दै सांसद प्रेम आलेले अहिले राजनीतिलाई पेशा बनाउने काम भइरहेको बताए ।

उनले आफू पनि चलचित्रमा रहेको भए राजनीतिक विकृतिहरु प्रष्ट्याउने भन्दै चलचित्र राजनीतिक कथा वस्तुमा राम्रो बनेको बताए । चलचित्रका निर्माता प्रितम लामिछाने र आध्या लामिछाने हुन् । भदौको १४ गतेबाट चलचित्र देशव्यापी प्रदर्शनमा आउने छ ।