काठमाडौं । अनुगमनको क्रममा संघीय मामिला तथा सामान्य प्रशासन मन्त्रालयकै धेरै कर्मचारी बाहिरी पोशाक लगाएर जाने, पूरै समय कार्यालयमा नबस्ने, आफू खुशी हिँड्ने गरेको भेटिएको छ ।
पोशाकका लागि वार्षिक १० हजार भत्ता बुझ्ने तर ‘हिरोइज्म’ देखाउँदै चुल्ठेमुन्द्रे शैलीमा कार्यालय पुग्ने कर्मचारीकै बिगबिगी अचेल सिंहदरबारमै देखिएको हो । अरु कर्मचारीलाई नीति नियम सिकाउने संघीय मामिला तथा सामान्य प्रशासन मन्त्रालयका कर्मचारीहरु नै नीति नियम उडाउने गरेको भेटिएका छन् ।
राष्ट्रिय सर्तकता केन्द्रले संघीय मामिला तथा सामान्य प्रशासन मन्त्रालयमा अनुगमन गर्दा अधिकांश कर्मचारीहरूले तोकिएको पोशाक नलगाइ कार्यालय जाने गरेको पाइएको छ ।
राष्ट्रिय सतर्कता केन्द्रले यही माघ ११ गते गरेको छड्के अनुगमनमा संघीयका १८ जना कर्मचारी तोकिएको पोशाक नलगाई कार्यालय पुगेका थिए । यसरी तोकिएको पोशाक नलगाइ कार्यालय पुग्नेमा सहसचिवदेखि कार्यालय सहयोगीसम्म रहेका केन्द्रले जनाएको छ ।
