अजय देवगनको वास्तविक नाम विशाल वीरु देवगन हो । उनका नजिकका साथीभाइ, आफन्त र परिवारका सदस्यले उनलाई ‘राजु’ भनेर बोलाउँछन् । अजयको खास चिनारी एक्सन हिरोको रुपमा छ । यद्यपी उनी रोमान्टिक र कमेडी हिरोको रुपमा पनि उत्तिकै जमेका छन् ।
अजय ‘फूल और कांटे’ हुँदै ‘जीगर’, ‘विजयपथ’, ‘दिलवाले’, ‘दिलजले’, ‘इश्क’सम्म आइपुग्दा उनी एक्सन हिरोबाट लभर ब्वाईमा रुपान्तरण भइसकेका थिए । त्यसबेला अजयको डायलग, स्टाइल खुब बिक्थ्यो । अहिले पनि अजयको ‘मार्केट’ घटेको छैन, उस्तै छ ।
उनको करियर जस्तै प्रेम पनि सफल छ । अजयले अभिनेत्री काजोलसँग विवाह गरेका थिए । अहिले उनीहरु दुई छोराछोरीका आमाबुवा बनेका छन् । दुबै छोराछोरी हुर्किसके । यतिबेला पनि काजोल र अजयको लभ लाइफबारे चर्चा भइरहन्छ ।
रमाइलो त के भने, जतिबेला काजोल र अजय एउटै फिल्ममा काम गर्थे, त्यसबेला काजोल अरु कसैसँगको अफेयरमा थिइन् । काजोलले आफ्नो प्रेम सम्बन्धबारे कुनै जिज्ञासा मेट्नुपरेमा अजयसँग नै कुरा गर्थिन् त्यतिबेला । तर, पछि भने अजय र काजोल आपसमा एकाकार भए ।
अजय र काजोलको भेट पहिलो पटक सेटमा भएको थियो । त्यसबेला काजोललाई अजय देवगन घमन्डी जस्तै लागेको थियो । तर, पछि उनको भ्रम हट्यो । काजोल र अजय एकअर्काको राम्रा साथी थिए । तर, क्रमशस् उनीहरुको मित्रता प्रेममा बद्लियो । दुबैले कहिले पनि एकअर्कालाई प्रस्ताव गरेनन् । यद्यपी उनीहरुले एकअर्काले मन पराएको अनुभूत भने गरिरहे ।
अहिले बलिउडकर्मीको विवाहले सर्वत्र तरंग पैदा गर्छ । उनीहरुको विवाहको निमन्त्रण कार्डदेखि भोजसम्मको अनेकन चर्चा हुन्छ । विवाहको रौनक सेलाउन महिना दिन लाग्छ । तर, अजय र काजोलको विवाह एकदमै सामान्य ढंगले भएको थियो ।
खासमा अजय धेरै भव्य ढंगले वा तामझामका साथ विवाह गर्ने पक्षमा थिएनन् । त्यसैले उनी आफ्नो बेडरुमबाट तयार भएर छतमा गए, जहाँ विवाहको सारा विधी पुरा गरियो । घरको छतमा नै उनले काजोलसँग सात फेरो लिए । त्यसपछि दुबै आफ्नो कोठामा फर्किए । उनीहरुले २४ फेब्रुअरी १९९९ मा विवाह गरेका थिए ।
