फर्जी कागजात तयार गरेर ९ करोड ऋण, फरार एक जना पक्राउ

काठमाडौं । फर्जी कागजात तयार गरेर ऋण लिई क्यापिटल मर्चेन्ट तथा फाइनान्स कम्पनी लिमिटेडलाई ९ करोड रुपैयाँभन्दा बढी हानी पुर्‍याएर फरार रहेका एक जनालाई प्रहरीले पक्राउ गरेको छ । पक्राउ पर्नेमा काभ्रेपलाञ्चोक पनौती नगरपालिका ६ बस्ने ६७ वर्षीय रामभक्त थापा रहेका छन् ।

केन्द्रीय अनुसन्धान ब्यूरो (सीआईबी) का अनुसार थापाले कम्पनीका पदाधिकारी र कर्मचारीहरूलाई प्रभावमा पारी काभ्रे ब्रोइलर सप्लायर्स नामक निजी फर्मको कागजात तयार गरी आठ करोड ५० लाख रुपैयाँ कर्जा लिएका थिए । उनले सो कर्जा दुरुपयोग गरी कम्पनीलाई ९ करोड ७ लाख ६ हजार ३ सय ७८ रुपैयाँ ७४ पैसा बिगो बराबर हानी पुर्‍याएका थिए ।

यस बैंकिङ कसुर मुद्दामा साबिक पुनरावेदन अदालत पाटनले २०७१ साल वैशाख २९ गते फैसला गर्दै थापालाई बैंकिङ कसुर तथा सजाय ऐन २०६४ को दफा १५(२) (घ) बमोजिम ३ वर्ष कैद र बिगो असुल गरी बिगो बमोजिम जरिवाना हुने ठहर गरेको थियो । तर, उनी फरार रही उक्त सजाय बेरुजू रहेको थियो ।

सीआईबीको टोलीले थापालाई शुक्रबार काठमाडौंको कोटेश्वरबाट पक्राउ गरेको थियो । उनलाई फैसला कार्यान्वयनका लागि आइतबार काठमाडौं जिल्ला अदालतमा पेस गरिएको छ ।