मेयरको लापरबाहीका कारण कटहरियाका हजारौँ विद्यार्थी परीक्षाबाट बञ्चित

रौतहट । रौतहटको कटहरिया नगरपालिकाका मेयरको कारण नगर अन्तर्गत सामुदायिक विद्यालयहरूमा अध्ययनरत हजारौँ विधार्थी अर्धवार्षिक परीक्षाबाट बञ्चित भएका छन्। केही समय अघि बिशेष अदालतबाट सफाई पाएर पुनः पद बहाली भएका मेयर अजयप्रकाश जैसवालको लापरवाहीको  कारण हजारौँ विद्यार्थीको भविष्य अन्यौल बनेको हो।

कटहरिया नगरक्षेत्र भित्र ५ वटा माबि, ५ निमाबी र १४ प्राबि गरी कुल २४ सामुदायिक विद्यालयमा कक्षा १ देखी १० सम्म १२ हजार भन्दा बढी विधार्थी अध्ययनरत रहेको पूर्व नगर शिक्षा संयोजक अनिल कुमार निधिले बताएका छन्।

यस आर्थिक वर्षमा नयाँ शैक्षिकसत्र गत वैशाखमा सुरु भएको थियो। शैक्षिक सत्रको हिसाबले गत कार्तिक मसान्त भित्र अर्धवार्षिक परीक्षा सम्पन्न हुनुपर्ने शिक्षकहरुले बताएका छन्।

नगरक्षेत्र अन्तर्गतका सामुदायिक विद्यालयहरूमा त्रैमासिक परीक्षा बिद्यालय स्वयं आफ्नो स्रोत साधनले गराउने बाँकी अर्धवार्षिक र बार्षिक परीक्षा गराउन नगरपालिकाले ब्यवस्था गर्दैआएको माबी भसेढवाका प्रधानाध्यापक राममंगल यादवले बताएका छन्।

तर पुस महिनाको अन्तिम सातासम्म पनी नगरपालिकाले स्रोत साधन उपलब्ध नगराएको कारण कटहरियाको कुनै पनि सामुदायिक विद्यालयमा हालसम्म अर्धवार्षिक परीक्षा हुन नसकेको प्रधानाध्यापक यादवले जानकारी दिएका छन्।

यसरी निर्धारित समय भन्दा ३ महिना बढी बित्दा पनि हालसम्म अर्धवार्षिक परीक्षाको सुरसार सम्म नहुँदा हजारौँ विद्यार्थीको भविष्यसँग खेलवाड भईरहेको अभिभावकहरुले गुनासो गरेका छन्।

कटहरिया ७ का वडा अध्यक्ष सहिद मियाँ दर्जीले परीक्षा गराउन लाग्ने खर्च बिद्यालयहरुलाई समयमा नदिनु मेयर जैसवालको चरम लापरवाही रहेको गुनासो गरेका छन्। अर्धवार्षिक परिक्षा सञ्चालन गर्न लाग्ने खर्च उपलब्ध गराउन पटक पटक नगर शिक्षा समिती संगै नगरपालिका लाई आग्रह गर्दा कसैले वास्ता नगरेको शिक्षकहरूको गुनासो रहेको छ।

नगर शिक्षा संयोजक सुरेन्द्र ठाकुरले नगरपालिका र मेयरको बचाउ गर्दै वडा अध्यक्षहरुले बार्षिक र अर्धवार्षिक परीक्षाको लागि रकम न छुट्याएकाले समयमा हुन नसकेको भन्दै ढाँट्न खोजेका छन्।

ठाकुरले हाल नगरपालिकामा तालाबन्दी भएको कारण कठिनाई भएपनि अर्धवार्षिक परीक्षाको खर्च जुटाउन आफू प्रयासरत रहेको भन्दै पन्छिएका छन्। कटहरियाकी उपमेयर रिता देवी यादवले शिक्षा संयोजक सुरेन्द्र ठाकुरले मेयरलाई बचाउ गर्न झुठो बोलिरहेको बताएकी छिन्।

आफू निर्वाचित भए देखिनै नगरपालिका अन्तर्गतका सबै सामुदायिक विद्यालयहरूमा अर्धवार्षिक र बार्षिक परीक्षा गराउन लाग्ने सम्पूर्ण खर्च नगरपालिकाले दिँदै आएको छ र अहिले वडा अध्यक्षको नाम राखेर हुन्छ उपमेयर यादवले दाबी गरेकी छिन्।

उल्लेखनीय छ नगरपालिकामा जनप्रतिनिधिहरुले यही पुस ९ गते तालाबन्दी गरेका थिए जबकी परीक्षा कात्तिक मसान्तमा हुनुपर्ने हो।