जेन–जी आन्दोलनका घाइते भेट्न अस्पताल जाँदै प्रधानमन्त्री कार्की, लगत्तै चौकी निरीक्षणमा निस्किने

काठमाडौं । प्रधानमन्त्री सुशीला कार्की यही भदौ २३ र २४ गते भएको जेन जी आन्दोलनका क्रममा घाइते भएका युवाहरूलाई भेट्न अस्पताल जाने भएकी छिन् । उनी आज अस्पतालमा पुगेर घाइतेहरुको अवस्था बुझ्ने जनाइएको छ । अहिले जेन–जी आन्दोलनको क्रममा घाइते भएकाहरुको ट्रमा सेन्टर र सिभिल अस्पतालमा उपचार भैरहेको छ ।

यस्तै, उनी कोटेश्वरस्थित प्रहरी चौकी र महाराजगञ्जस्थित प्रहरी वृत्तको निरीक्षण गर्नपनि जाने भएकी छिन् । जेन–जी आन्दोलनको क्रममा ५१ जनाको ज्यान गएको छ । यो आन्दोलनमा प्रहरीको पनि निधन भएको थियो । उनीहरुको पनि हिजो पशुपति आर्यघाटमा अन्तिम दाहसंस्कार गरिएको थियो ।