पर्सा । जेनजी आन्दोलनपछि रोकिएका मल आपूर्तिका गतिविधि मधेशमा पुनः सुरु भएका छन् । रक्सौल र सिर्सिया सुक्खा बन्दरगाहमा अड्किएका कृषि सामाग्री कम्पनीका डीएपी मल वीरगन्जस्थित गोदाममा भित्रिन थालेको छ ।
कम्पनीका प्रादेशिक प्रमुख दुर्गाप्रसाद पाण्डेका अनुसार, ‘ग्लोबल टेन्डरमार्फत आदित्य बिरला कम्पनीले रक्सौलमा ५ हजार टन र आईपीएल कम्पनीले सिर्सियामा २ हजार ५०० टन डीएपी मल ल्याएको थियो । तर जेनजी आन्दोलनका कारण गोदामसम्म पुर्याउने प्रक्रिया अवरुद्ध भएको थियो । अहिले अवस्था सामान्य हुँदै गएपछि मल भित्रिन क्रम पुनस् सुरु भएको छ ।’
उनले भने, ‘हाल कार्यालयसँग ७ हजार टन युरिया मलको कोटा छ । मधेशका ८ जिल्लाका सहकारीहरूले आफ्नो कोटा अनुसार मल वितरण सुरु गरिसकेका छन् । युरियाको माग अझै उच्च छ ।’ प्रादेशिक कृषि मन्त्रालयले ढिलाइ गरेकाले मल वितरण केही समय रोकिएको थियो ।
कम्पनीले आगामी चरणमा ग्लोबल टेन्डरमार्फत आयात गर्न लागेको ३० हजार टन युरिया तेस्रो मुलुकबाट कोलकाता बन्दरगाहमा अनलोडिङ प्रक्रियामा रहेको छ । पाण्डेका अनुसार, ‘कोलकाताबाट बोरामा प्याकिङ गरी असोज ९–१० गतेसम्म नेपाल भित्रिने सम्भावना छ । तर त्यति बेला दसैंको बिदा पर्ने भएकाले कोटा लागुमा अझ ढिलाइ हुन सक्छ ।’
मधेशका किसानहरूले हाल युरिया मलको चरम अभाव भोगिरहेका छन् । कम्पनी र साल्ट ट्रेडिङमार्फत पनि मल प्राप्त गर्न कठिनाइ भएको छ । भारतबाट मल ल्याउन भारत सरकारको कडाइका कारण असम्भव भएपछि केही किसानले युरियाको विकल्पको रूपमा डीएपी मल प्रयोग गरिरहेका छन् ।
