आईजीपी कार्कीको पहिलो निर्णय : सईसम्मका प्रहरीका लागि सहुलियत कर्जा वृद्धि

काठमाडौं । नवनियुक्त प्रहरी महानिरीक्षक (आईजीपी) दानबहादुर कार्कीले प्रहरी संगठनमा नेतृत्व सम्हाल्दै पहिलो निर्णयका रूपमा वरिष्ठ प्रहरी नायब निरीक्षक (सई)सम्मका प्रहरीका लागि सहुलियत कर्जा वृद्धि गर्ने घोषणा गरेका छन्।

आईजीपीको दर्ज्यानी चिन्ह ग्रहण गरेपछि बिहीबार प्रहरी प्रधान कार्यालय, नक्सालमा कार्यभार सम्हाल्दै उनले यो निर्णय गरेका हुन्। नेपाल प्रहरीका केन्द्रीय प्रवक्ता डीआईजी अबी नारायण काफ्लेका अनुसार उक्त निर्णय पोलिसी कोअर्डिनेशन कमिटी (PCC)बाट पारित भइसकेको छ।

उनका अनुसार आकस्मिक अवस्थाका लागि आकस्मिक सहुलियत अल्पकालीन कर्जा उपलब्ध गराइनेछ। यस प्रयोजनका लागि १० करोड रुपैयाँ छुट्याउने तयारी गरिएको छ। शिक्षा, स्वास्थ्य तथा घरायसी समस्यामा परेका प्रहरी कर्मचारीहरूलाई कार्यविधि बनाएर यो कर्जा दिइने बताइएको छ।

हालसम्म प्रहरी कर्मचारीलाई ५ प्रतिशत ब्याजदरमा यस्तो सहुलियत कर्जा दिइँदै आएको छ। यो कर्जा एक वर्षभित्र फिर्ता गर्नुपर्ने व्यवस्था छ। आईजीपी कार्कीको यो निर्णयलाई संगठनभित्र कर्मचारीमैत्री कदमका रूपमा लिइएको छ।